Axxam n yidles n Lmulud At Mεemmar yessudes-d, ddurt-agi yezrin yiwen n leqdic ɣef teγzi n 03 n wussan,anda yerra tajmilt i unaẓur Muḥya . Ilmend n waya, tella-d temzikkent di dderb n uxxam n yidles ( ayen uran yiγmisen γef Muḥya d wayen i d as-n-yenna).
Deg ass amenzu, d inigan i d-yemmeslayen γef umecwar n unaẓur.Yiwen n usarag yefka-t-id Saεid Cemmax, aselmad di tesdawit s usentel « Tasuqqilt i yexdem Muḥya». Ass wis sin, d ass n umezgun, imi snat n tceqqufin i yessuqel Muḥya γer teqbaylit i d-yellan. Tamenzut d «Si Laḥlu», turar-itt-id terbaεt n umezgun n Yimesdurar n temnaḍt n Meqlaε. Sakin d yiwen umunulug «Urgaγ Mmuteγ», yurar-it-id Sami Allam n terbaεt n umezgun n Bgayet. Ma d tasebḥit n wass n larebεa, sersen tamuqqint n yijeğğigen γef uẓekka n Muḥya di taddart At Rbaḥ, taγiwant n Yibudraren. Tameddit n wass tella-d yiwet n tγuri s-ɣur mass Salaḥ Gawa, s usentel «Salaḥ Gawa yecna-d Muḥya». Muḥend Uyaḥya, isem-is aḥeqqani Muḥya Σebd Llah, ilul ass amenzu n Yunbir deg useggas n 1950 deg temnaḍt n Yiεeẓẓugen, taddart-is taḥeqqanit d At Rbaḥ tamnaḍt n Yibudraren. Yelmed deg Σeẓẓugen deg uγerbaz amezwaru d ulemmas, syen yekcem γer tesnawit n Σmiruc n Tizi-Wezzu.Ass mi d-yewwi akayad n lbak, yekcem γer tesdawit n Lezzayer tamanaγt deg useggas n 1968 anda yeḍfer tusnagt, almi d 1972. Syen yunag γer tmurt n Fransa anda ikemmel ulmud-is di tesdawit n Paris VIII, dγa imir kan yekcem gar terbaεt n ugraw n tezrawin γef tmaziγt « GDB », din i yebda asuqel n tceqqufin n umezgun seg tutlayin tiberraniyin γer tutlayt n teqbaylit, gar-asent Brecht «L’exception de la règle» yerra-tt-id γer teqbaylit s usentel « lldi imi-k, ddu d uḍar-ik » deg useggas 1974, yeskels-itt-id di tezrigin «Tala», syen yerna-d tiyiḍ deg useggas n 1975, amedya «Tacbaylit» akked «Sinistri».
Leqdic n Muḥya ur yeḥbis ara deg umezgun kan, yura daγen tamedyazt s waṭas, γef tsertit, timetti, tigawt…. Ddeqs n yicennayen i d-icerwen seg-s, am Yidir, Ferḥat imaziγen imula deg usefru-nni i d-yessuqel Muḥya γer Boris Vian «Le déserteur» «Amẓarṭi », Barwagya i tecna terbaεt n yideflawen, «Muḥ n muḥ» i cnant tullas n ğerğer. Tewwi-t tmettant ass n 07 dujamber 2004 di tmanaγt n tmurt n Fransa Paris, yesεa 54 n yiseggasen.
Islam Bessaci