Deg lawan anda yennerna uɣbel n tnezduɣt di yal tama n tmurt, 24 n yixxamen mazal ar ass-a medlent tewwura-nsen ttrajun melmi ara ttwaferqen. Taluft-a d tin i neẓra deg tɣiwant n Uɣrib i d-yezgan ɣef 45 n kilumitr ɣef ugafa n twilayt n Tizi Uzzu. Iwakken ad d-nesmekti, ixxamen-a ttwabnen deg useggas n 1997 s-ɣur tɣiwant d CNEP. Segmi ur d-yelli ara wid yebɣan ad ten-aɣen, qqimen d ilmawen almi d aseggas n 2001. Dɣa di cwal-nni i tedder tmurt n Leqbayel, kkren kra n yimdanen kecmen-ten s yiɣil, zedɣen deg-sen. Ur tdum ara teswiɛt-a aṭas, yella-d usufeɣ n yimezdaɣ-a seg-sen mi akken uɣalen yixxamen-a s afus n OPGI. Ulamma yella-d kra akka n uɛiwed n wayen ixessren deg yixxamen-a deg useggas n 2007 anda tettuserref tedrimt s wazal n 4 n yimelyaren n ssantim, maca mazal yettban-d uhtuti deg-sen imi aṭas aya ur ttwazedɣen ara. Tamsalt d tin iceɣben imḍebren n tɣiwant yettnadin di yal tikkelt amek ara fsin tikerrist yecban ta, imi ḥala. Iwulem daɣ ad d-nini dakken taɣiwant-a tesfayda-d ḥala s yiwen n usenfar n lebni n 110 n tnezduɣin deg useggas n 2000, akked 56 n tnezduɣin n ssenf LSP yettwaferqen deg wagguren yezrin. Mazal 70 nniḍen i ssewjaden ar tura. Ma d lemɛawnat i lebni di tudrin, azal n 500 n tnezduɣin i yettwaferqen seg useggas n 2005 ɣer wass-a.
I.D
At ziki,
D tawrirt yettwattun !
At Ziki, d yiwet n tɣiwant i d- yezgan deg daira n Buzeggan i yellan deg usammar n lwilaya n Tizi Wezzu. Ttidiren deg-s wazal n 10 000 n yimezdaɣ iferqen ɣef 9 tudrin Agni Filkan, Tawrirt Buar, Iger Amran, Berkis, Amekrez, Iger mehdi, Buxiar, Imeǧdab d Mansura. Taɣiwant d tin yenḥafen, imi izgel-itt wahil n unegmu, d ayen yeǧǧan imezdaɣ-is nṭerren mačči d kra. Ɣas akken tezga-d deg leɛli n 1400 n lmitrat, ur tessaweḍ ara ad tt-id-iṣaḥ usenfar n ucuddu s aqadus n lgaz, ayen ara izegden di lḥif n yimezdaɣ deg tegrest i d-iteddun : asemmiḍ d lixsas n teqraɛtin n lgaz. Aḥric yerzan tafellaḥt neɣ PPDRI yezgel akk tudrin n tɣiwant-a. inelmaden-is, zgan ttmenṭaren anda ara yafen kra n ttawil n usiweḍ ɣer yiɣerbazen. Yiwen n uɣerbaz alemmas yellan deg udrar, yettwabna deg yiseggasen n 1990 yessaweḍ ad yettahud, imi ɛaddan fell-as 10 n yiseggasen, netta akken yettwaxedmen s Préfabriqué. Rnu ɣer waya, aṭṭanen i yezmer ad d-yeglu i yinelmaden yeqqaren deg-s. Ma d tasnawit, inelmaden teddun azal n 30 n kilumitr iwakken ad awḍen ɣer Buzeggan. Aḥric n tezmert yewwi amur-is n lḥif, imi ḥala yiwen n umejjay i yellan i wazal n 800 n yimezdaɣ, ma d imuḍinen-nniḍen, ssawaḍen-ten imawlan-nsen s ttawilat-nsen,
D. I