Kra n wussan kan ad nemdel tiwuura n wayen akken i ɣ-yeǧǧan xas yeǧǧa-d deg-naɣ kra, ad iruḥ useggas, ad ilal gma-s, snin am useqlad n tezwal i d-ntekkes di tmurt, yal imi ara d-yeḥder lawan-is. Ḥemmleɣ iḍ-nni aneggaru n useggas, wissen ma medden ak am nek i ttmuqulen ɣur-s neɣ yal wa d tamuɣli-s? Iḍ-nni a nessiɣ tiftilin s rriḥa n lfal amerbuḥ, d asfillet i lxir d wayen yelhan, ad d-yedlu fell-aɣ xas akken yettu-yaɣ d iseggasen-aya tura. Nesni aseggas am twizet ɣlayen nteffer di tekwat n lbaḍna, lbaḍna deg-s ay tella…….Nurja i yurja ufellaḥ, hubben-d leryaḥ, yefra lḥebb ɣef walim. A tiṭ-iw ffel akin i tizi, ssiked deg waziwen, tilin llan, lɣella ulac! Aṭas i yuraren yid-naɣ, yis-naɣ s tseqqaḍ, ta yečča-tt, ta yessečč-aɣ-tt. Nwala mebɛid ifeṭṭiwjen n tmes yuɣen s tegrawliwin, di yal tama, nekni tuɣ deg-naɣ, newwa, nerɣa, rɣan yelmeẓyen, sseḥman wiyiḍ! Nwala tiferyin ssemsaden yemcumen, zellunt deg wamur-nneɣ d nekni nettwali, urgan tafsut n tuɣalin ɣer tissit n idammen, idammen n watmaten-nnsen i wumi rran takmamt i yimi neɣ aht rran-tt iman-nnsen seg wakken huban ccac amellal ttrusen tarusi n bessif. Nesla s teqbaylit terɛed di Tizi, terna-d ɣer weltma-s, ad cqirrwent at wadda d at ufella, ad ssidrent iseɣ, ma xḍant i zzerb n uɣanim! Nḥulfa s lxiḍ n useggad s uxatel mi yezzi i temgerṭ n ineɣmasen, i temgerṭ n tdukliwin, la itezzi fell-asen irennu alma yeffeɣ-iten rruḥ neɣ ad idiren am imurdusen ur nezmir i kra, azaylal yella, tudert ulac! Nwala adrim amek yerra medden d idim, iseqqed deg-sen irennu almi ddreɣlent wallen. Uqbel ad yemlal wass d yiḍ, uqbel a nemdel tawwurt a nelli tayeḍ, ad nbedd i tizi, a nessiked akin, ad nqabel amennuɣ i ɣ-yeggunin. Mazal ad d-nḥelli tilelli i yiles d yemru, ad nadi tamurt qbel timura n medden, ad nesres i teqbayliyin talaba tamellalt ur yettali wammus deg irebbi n Tizi, ad nbeddel imensi i Yennayer, ad nbeddel tikli, ad nleqqem amennuɣ s usekkud n tfeswin, lxir ar zdat, am ass-a d wussan. Mazal azeɣbub n usirem deg wayen i nruja aṭas, yal ass yesmaday amur, yettak nnuba i tudert s wecqirrew d usekkud deg wayen akken i ɣ-yettačaren tiṭ. Mazal tiwwura n lxir ad brirḥent, mazal ṣṣut ad as-d-slen wid yesɛuzzugen i tidet zeddigen am lekfen, mazal acewwiq deg wass n tuɣalin ɣer tmurt deg-i i d-nekker, acewwiq i Yidir i d-yessuysen amur di tmura n medden, taɣect-is tserreḥ s tamment n lḥerr, ad yidir yerna di tmurt-is imi Mazal lxir ar zat..
Zira