Isaḥ yiẓri-w
Yejreḥ wul-iw
Ɣaben yitran
Ttun iggeni-w
Yekbel yixef-iw
Yekaw ṣṣut-iw
Sebken wusan
Celḥen lɛemeṛ iw
Deg taxamt deg yexmet wul-iw ,tugdi teṭṭef tasga. Tasusmi iyi- d yezzin tetthudu iɣulad n temsliwt. Si yal tama , yeḍleq ṭṭlam icuḍaḍ -is ɣef tagnit. Iḍuden-iw sferfden anda ara a kem- id- affen. Nnuleɣ ifassen-im, ufiɣ-ten gersen, ulin-ten yizeblac. Huzzeɣ ṣṣura-m, amer ad tendekwaleḍ, ulac ! Tqeḍɛeḍ aharek, xas
akken allen-im ldin-t !
Anda-t wayen i nḥamel
Anda akka yeɣba later-is
Deg timizart i nehmel
Lḥif yeqqed umur-is
D iseɣ ziɣ i nesenɣel
Di lqima-s i nesrxis
Iswarteɣ zzman ddel
Nekni nneneḍ deg ijufar-is
Ḥekreɣ deg allen-im, wallaɣ asegrareb ur d ttmagger luḍa. Din mennaɣ innig deg uzabuq deg belɛent tiṭiṭucin-im. Menaɣ innig deg-sen-t akken ad dluɣ ɣef wayen ɣef ur yedli yiwen. Akken,ɣef tikelt, ad illiɣ beṛṛa akked daxal n lejwareḥ-im.
Yedda wi yeddan
S kra ɛeban
D taẓayet n lhem
D tefses i d- tettban
Yucna wi yecnan
Awal yellan
Deg ilem yedhem
Yedem-it lawan
Ayen i d -illulen
Ur yeṭṭif amkan
Teqfel tezzem
Ulac afran
Bɣiɣ ad zedreɣ deg yilem-nni( n wallen-im) , akken ad merḥeɣ di taxliǧin n tfaka-m. Akken ad nnadiɣ ɣef yiman yekran di ṣṣura-m , amer as mmleɣ imeslayen werǧin id m-nniɣ asmi akken mazal tedreḍ.
Ih, bɣiɣ as inniɣ amek kecmeɣ di leɣṛur armi zgleɣ anamek n tillin-inem ɣer idisan-iw. Bɣiɣ as inniɣ amek werǧin fehmeɣ di tegnatin n times , belli kem d tacriḥt deg yixef-iw. Lemɛna tura ixef-im yunnag! Anda id yegra ? Ẓriɣ d awezɣi a yi-t-id temleḍ. Ahat kem s timad-im,yis ur teɛlimed !
Anwa assif it- inehren ? Anta ṣṣura deg i-ireṣṣa leqrar ? Ul-iw yeqqar kan : « wissen ma d -tekreḍ akken d isin fell-as a nnadi ? Iḍul ubrid id aɣ yegunin !
Ansi ara d naggem nmara s wacu ara neqazem abrid id aɣ- yettraǧun ? Xas tamusni-nni nekseb yakken , wissen ma ad aɣ -tilli d aɛwin ?
Ullin-d iragen n lḥamu si lǧesa-m. Wissen ,ahat dayen tbegseḍ i tikli. Ɣiwel zwi acḍaḍ-im, bedd ɣef yiman-im., ttu belli temuteḍ, awid afus –im tettuḍ yidi ad nqeleb ɣef isufer n tudert ! Ddu yidi akken a nerzu ɣef lemqamet deg ɛeggu i tettu iman-is !
Ddu yidi akken ad nejbu ɣer tibḥirin deg werǧin ttɣaren yiǧeǧigen ! Ɣer tigzirin deg tiliwa n ccna werǧin ttkawent. Rzud ɣer wul-iw akken ad yeṣfeḍ dnub n timurṣaḍ it- ikerfen !
Ixef-iw yellan d awḥid yuyes !
I wumi ṣṣura i ḥebsen ixef-iw, ma yal kem yidi ur telliḍ ?
Tidet xas akka temuteḍ , mazal teḥwaj ikem tasa-w !
Ala kem is yeggan lewhi i lɛmer-iw ! Ayen i kem-nnɣiɣ ? Acu n teslibi iyi iɛnan assen mi im-qemḍeɣ ṛṛuḥ ? Anda tezdeɣ sseba ? Tixilem ma ur yi-d temliḍ lejwab i tuttra-w ! Rred leɛnaya-m xas i tikelt tanegarut !
La nettezzeg deg yir tafsut
Tizelgi nɛebedd isem-is
Nettawi senjaq n lmut
Amzun iseḥreɣ wudem-is
Aḍar m yezgel tbut
Yuɣal yerkeḍ ɣef ugris
Yuffa sseba d tagut
Yettu is ad tt-iggan d ṛay-is
Tidet, xas akka temuteḍ mazal temlek-d –iyi ! Mazal ikem nnig-i !Anwa ara yi-d yecnun akka d tasawent ccna –nni yezuznen temẓi-w ? Anwa ara yefsin tiyersiwin yeẓden ɣef ufagag n lɛemer-iw ? Anwa ara yenfun tugdi si tesga n wul-iw ?
Cfiɣ asmi iyi d tenniḍ : « tayri tettwebna s tiḥajurin n leḥnana , iblaḍen-is zdin s imraren n isudan… ». Assen ḍsiɣ ɣef telqaq n wul-im !
Amek akken-nni
D acu-t waken-nni
Tamuɣli tezder
Deg yir lemri
Aglim n cḥani
Amek yezwi
Allaɣ yegger
Deg yir tamusni
Tendem tilleli
Yejla kulci
Lisser yeqfer
Tenqedwa tirni
Cerḍeɣ kulec di kulec ! Nniɣ iftaten ur d ttagen tawant ! Sɣerṣeɣ imraren n ṣṣwab !
Ttuɣ belli d dwam i iqeṭɛen lewham ! Ttuɣ belli leḥmala, lsas-is d lɛafya !
Mačči d yiwet i lemdeɣ ɣer tama-m. Seg adlis-im i ḥefḍeɣ belli yesleb win inuden tamsunt beṛṛa n idisan –im. Ɣurem i yufiɣ lbena n lehna akked udem n tudert.
Acu n tselbi i d-ihuben felli armi rekḍeɣ s yir aḍar lǧenet yecban tina ?.
Ayen i tɛmed tudert, i tillin n yemcumen icuben ɣuri ? Muqleɣ s allen-im, uffiɣ ul-im isuref iyi.Tidet, xas ur telliḍ, riḥa n yixef-im tekseb leḥyuḍ d imanaren !
Tugiḍ ad zedreɣ di lbir n ndama….
Idir ! Idir kem, annef ad mteɣ nekki !
Ɣef yimim ilulled ucmumeḥ, yerran tiɣri-w d temeɛlalt.. tifeḍ-iyi !
Simmal qareɣ temuteḍ….ziɣ kem tettidireḍ ! Ixef -im icerreg aɛjer n tufra…riḥa-m tesbur i tagnit.. Teserɣ ticrurin n iḥulfan iw !
Tidet, di leɛmer tedreḍ am akka tedreḍ tura ! D nekk iwumi tegres ṣṣura, kem d lḥamu !
Amek ara yiddir yisem
Ma yella yenɣunza-t yixef-is
Amek ara yeččar yilem
Ma nettmekkin lmtel-is
Wid i d-yeqqaren llah yerḥem
Ṛṛeḥma ksen amur-is
Wid i d-yeqaren ula i nexdem
Zzman ixdem cɣel-is !
Tfaqeḍ s wanect-a akken kan deg iyi-tenuleḍ ! Teẓrid ixef-iw mi yuffeg yejla deg yilem yeččuren tamuɣli-w ! Yir innig assen i yebda fell-i !
Tidet d kem i tudert, ma d nekk d tesmeḍ m izeblucen !
Idir kem, d tameṭut… êǧg later-im ɣef tiwenziwin iɣunza usirem.
Idir kem, amer yiwwas, mi ɛayent deg-nneɣ timedlin, d azmumeg-im ara aɣ id yasakin !
Ait Slimane Hamid