Di temlilit ‘’Awal i unaẓur’’ i yettilin deg Uxxam n yidles Mulud Mεemri yal aggur, tikelt-a, Slimane Belharet inced-d Malika Domrane d Malik Kezoui (wagi d acennay ajdid). Timlilit-a γef wakken i d-nnan d tajmilt i Crif Xeddam. Awal, ihi, yebda γeγ tmeddurt n Malika Domrane: seg wasmi tekcem γer lakul armi tewweḍ γer Fransa. Yal tikelt, ad as-d-yesmekti slimane Belharet yiwet n tedyant i as-yeḍran neγ i texdem nettat s timmad-is. Xas akken tettban-d tettsetḥi, meεna tenna-d akk ayen tebγa. Γef temsalt n tutlayt tenna-d:’’d les sœurs blanches i islemden taqbaylit mačči d imawlan-iw. Imawlal-iw heddren-iyi-d s tefrensist.’’ Ma γef Matoub tenna-d: ‘’Matoub d argaz d wawal. Yessen ad iqader tameṭṭut. Yessen iwumi qqaren nnif d lḥerma mi ara tiliḍ yid-s. Asmi i aγ-ṭṭfen di Lezzayer, mbaεd mi aγ-wwin γer commissariat, kkes-d akken ur aγ-xdimen ara, ur asen-teqqid tasa. Ihi, wwin-aγ γer yiwen usensu (hôtel), sgen-aγ deg yiwet n texxamt nekk d Matoub i wakken ad aγ-cemten. Dγa yenna-yi-d Matoub ‘’xas ṭṭes, ur ttagad ara.’’ Tesmakta-d di&gamma,; asmi i teεreḍ ad tneγ iman-is di commissariat deg useggas n 1980 mi tt-ṭṭfen tikelt tamezwarut. Tugad ad kksen fell-as sser, dγa tegzem aẓar deg ufus-is. Seg wasmi tella meẓẓiyet i tekcem annar-agi umennuγ. Tella tettaru-asen γer Fransa i Bessaoud Mouhand Arab, Slimane Azem d wiyaḍ. Ma γef wasmi tella di tesnawit tenna-d:’’di temsirin n taεrabt i ttaruγ isefra. Nekk γriγ s tefrensist γer ‘’Tmasurin’’ (sœurs blanches). Di tesnawit i bdiγ cennuγ akked la chorale.’’ Meεna, ayen yeṭṭfen ddehn n wid iḥedren timilit, d imir mi d-tenna ‘’ugiγ ad as-selseγ abernus i Boumediene.’’ Mi as-yenna Slimane Belharet, acuγer? Terra-as-d akka:’’abernus d azamul n teqbaylit, d nnif, d lḥerma. Ur t-yuklal ara win yebγan ad yemḥu laṣel-nneγ.’’
Di taggara, tṛeggem i wid tt-iḥemlen dakken ad d-tuγal γer ccna deg ussan i d-iteddun.
Hocine.M