Atta-n daɣ tura, terza-d tin akken iqebḍen lerwaḥ ! Amzun akken d afras n yiɣewdan iwumi i d-testufa. Mazal i teḥli temxixt n Dda Chérif KHEDDAM, terra-d lewhi n At Sidi Ɛetman. D yiwen akken n urgaz yesseḥbibiren ɣef yidles-is i d-teqsed. Dda Muḥ, akka i as-ssawalen s kra n win i t-yesnen yunag s anda ur d-yettuɣal, s anda akken wwḍen yirgazen d tlawin i d-inejren abrid n tissas.
85 n yiseggasen di lɛemr-is, maca amzun akken yedder sin igima ! Mi ara s-isel uqbayli yettmeslay-d ɣef Ccix Muḥend, ad d-tiniḍ yella ɣur-s d axewni. Mi ara d-yebder Si Muḥend, dɣa ad tenwuḍ jmiɛ i zegren ɣer Tunes. Yekcem deg umezruy n yidles almi d talaqa !
Sya ɣer da, ad d-yini : « Cfiɣ yiwen n wass Dda Lmulud… » dɣa, din ara yeḥbes wallaɣ n umdan i ttxamim, seg leqder iga i kra n win yellan meqqer fell-as, di leɛmer wala di tmusni.
Tudert-is i merra d amennuɣ. Di tegrawla, yella d « le commissaire politique » di temnaḍt n Tiaret, imi tabɣest yekseb akked tayri n tmurt tessaweḍ-it ad isebbel tarwiḥt-is ɣef timunent.
Mbeɛd, d amaṭṭaf wis sin n rradyu i yuɣalen d axxam-is almi d taggara n wussan-is. Aniwa acennay ur iwelleh ara ? Aniwa amedyaz iwumi ur yelli ara tiwwura n rradyu ? Dɣa, ɣef waya i d-yemmeslay Lounis Ait Menguellet lawan n temḍelt n Belḥanafi : « iruḥ-aɣ yiwen n urgaz ameqran, ikesben tissas d nnif. D netta i aɣ-yeldin tiwwura n rradyu asmi akken ur yezmir yiwen ad ixemmem dakken yezmer ad yerzu s amaṭṭaf-a iwakken ad yessefru neɣ ad yecnu neɣ ahat ad yessekles. Injer-d abrid di lawan n lḥers. »
Ass-a, d acu i nezmer ad t-nexdem ? Di tazwara d asiweḍ n rreḥma, tin ɣer-s, ad as-nini i Dda Muḥ, ṭṭes di talwit, lkanun ur ixessi ara, mazal ad nessiẓen ɣer yiri-s.
S. M