Ɣas akken lwilaya n Tizi wezzu d tin yesɛan ddeqs n tkebbaniyin tilemmasin d tmeẓyanin, teṭṭef amkan wis rebɛa gar lwilayat n tmurt. Ɣef leḥsab n tnemhalt n tkebbaniyin timeẓyanin d lḥirfat n ufus, gar wazal n 8000 n tkebbaniyin i yellan deg lwilaya, deg tuget deg-sent d tid yeɛnan aḥric n srabes neɣ “les services” s wazal n 1847 n tkebbaniyin, teḍfer-itent-id tid n tjara s wazal n 1669 n tkebbaniyin ma d amḍiq wis tlata ad naf d aḥric n lebni.
Ulamma wid i isbedden tikebbaniyin-a ssaramen s asnulfu n yimukan n uxeddim d usnerni deg uḥric n ugemmu, maca uguren i d-ttmagaren deg unnar ladɣa iɛewwiqen gar-asen d lbankat i yugin ad d-tessufeɣ ireṭṭalen teǧǧa acḥal d asenfar igellel.
Ma d ayen yerzan lḥirfat n ufus ideg llan wazal n 3 493 n yimdanen gar-asen iḥeddaden n lfeṭṭa, taleɣt d yiselsa, aḥric-a ur yemniɛ ara seg lixṣas imi isufar imenza ur d-ttasen ara akken i ten-bɣan yimawlan-nsen.
Dalila I.
Lixṣas n lɣella n lbaṭaṭa
Lɣella n lbaṭaṭa d tin i ineɣsen acemma aseggas-a deg lwilaya n Tizi Wezzu, aya d ayen yeǧǧan ssuma-s ad tali almi d 85 n yidinaren I kilu. Ɣef leḥsab n tnemhalt n tfellaḥt n lwilaya, azal n 405 000 iqenṭaren n baṭaṭa i yetturajun aseggas-a, s wazal n 230 iqenṭaren/uhigṭar.
Deg 1740 ihigṭren, gar-asen 689 ihigṭren ttwaheggan i lbaṭaṭa tamenzut d tneggarut, d 326 i tin n wuẓu. Ad nerr tamawt belli uẓu n lbaṭaṭa deg lwilaya mazal ur d-telli ara s ssebba n ugeffur i yewten s cedda deg waggur n furar yezrin, ayen i d-yesseglan s lexṣara n 8280 iqenṭaren n lbaṭaṭa.
Dalila I.