Nniqal nesseḥmac ad yelli wexxam n yidles n Iɛezzugen tiwwura-s, yerna ad as-iger irebbi i tfaska n ssinima s tmaziɣt ara d-yilin di tagara n meɣres-agi deg-i nella, ziɣen meɣres d tidet, am yennayer, ma ur yewwit s imezwura ad yewwet s ineggura! Diɣ netta akken i yewwet iɣisi annect ilat tala uqucaḥ d yiɣil n wuzzal, deg Iɛezzugen. Yewwet iɣisi yegla s yidles-nni, a nerju diɣen amur nniḍen ara ɣ-d-squcḥen wid-nni yettgallan ur ḥennten, wid-nni ur nḥezzeb ara i wasmi ara tsew lqaɛa almma terwa, imi tfud idles d leqrun-aya, ur rjin ara ad yessaɣ wedfel, ad feggḍent tliwa ddaw tmurt, imi ulac ansi ara kken waman nnig-s. Abrid iceqqeq, ad as-tiniḍ yella win i s-yennan i lqaɛa lli, ad tesbelɛed kra yellan, ixxamen atan tikelt-a menɛen ur ɣlin ara, ixellef-iten-id usyax aseggas-a, i qabel wi tt-iḍemnen?! Lebni apipri kan, awi-d kan axxam, anida-t? Anaɣ din, ar daxel ay ul! Ruḥ tura keč, i wannect nni n yexxamen yembabben wa ɣef wa, nessalay deg wayen ur qettɛent wallen, anda akken ur ilaq. Iiiiiiiiiiih! Bac ad k-id-iṣaḥ wexxam deg Iɛezzugen, alma tcubaḍ s agur, netta deg igenni, keč di lqaɛa, imi medden ak ttmennin-d tamɛict di temdint igan ccan i kullec: tudert, tezdeg, lefhama, iseɣ, taqbaylit, artg. Wi bɣan ussan di tmurt, yerzu ɣur-s. Tura, amek ara qablen annect-a n lexsara? Akken lhan waman i diri-ten ticki ur sen-nserreḥ ara ad lḥun. Nnan, zik asmi tella Fransa , sebɛa n tliwa i yellan deg Iɛezzugen, maci kan akka i ccbaḥa neɣ d fad i fuden medden, d annect-nni n waman i yellan ddaw n tmurt n Iɛezzugen i ɣef d-ttekksen dderk, ttfeggiḍen-d ɣer berra, ass-a tiliwa-nni yak ulac-itent bexlaf tin n taddart n tala n uqucaḥ, i lukan mazal-itent ahat ur iḍerru ara ubaxix-agi, ahat ur yekkat ara wessyax, ur derrmen ara yexxamen, ur ttagaden ara medden azekka. Ahat, wissen?!! Win yerḥan ad yesteqsi, ayen akka la nbennu kan, akken d-tusa akken? Akal yella, awi-d kan win ara s-igen leqrar, a nettu talast-a d talast-ina, a nettu imḥaddan d ucaraɛ, a nezdi tagmat, a nḥader iman-nneɣ, a nḥader Tamurt n wakal d idammen.
Zira