Nres tarusi n ufrux n lḥerr ineqqben di kra n wayen ilhan. Deg ubrid n tuɣalin seg udrar n fad , deg at Smaɛil, di Bgayet, almi d Tizi Wezzu i yellin icuḍaḍ ubernus-is amellal, d leɛnaya i kra din d inebgawen i d-yerzan ɣer tfaska n ssinima s tmaziɣt. Lḥerk meqqar : aṭas n inaẓuren, n at yidles d ineɣmasen i d-yerzan akken ad as-ḥedren i tfaska n tikelt-a imi tewwi-d abrid d amxalef : si 1999 d nutni ttrusen di tamiwin n tmurt am trusi n uferṭeṭṭu ɣef ujeǧǧig-is, sakin tuɣal tres di Tizi tarusi n waman Uzeffun yesswen fad n tmusni d usnulfu n isura di tmurt i degi mmɣen iẓuran n lfenn akad i tlisa n tmurt n leqbayel. Xas akken iruḥ lḥal maɛna tawwurt n ssinima ara kecmaɣ, i tikelt tamezwarut, telli-d s tehri. Awal amezwaru d llsas, d lfal i kra n wussan ara tdum tfaska-yagi. Yal yiwen i d ccɣel-is, yal yiwen i d tamuɣli-s, awi-d kan ad gerrzen, ad berzen lecɣal. Akken i d-tres di Tizi, i tres di ddeq-s n tamiwin-ines: Larbɛa n at Yiraten, Micli, Draɛ Lmizan, Azeffun, Tigzirt, Tizi Raced, Iɛezzugen d Buzgan, i tikelt tamezwarut, xas akken ixuṣ ttawil, xuṣṣent tzeɣwin, imi tirza n ssinima ɣer medden, ɣer imuḍan n sbiṭar n Wad Ɛisi, tcuba ddwa ḥellu, d aɛaruḍ n tmuɣli-nneɣ ɣer yiman-nneɣ, n tmuɣli n medden ɣer-naɣ. Akken tebɣuḍ tissineḍ ad d-tafeḍ iman-ik am zun akken ur tessineḍ tigert deg wayen ttwalint wallen d wayen sellen imeẓẓuɣen. Imi ara tqableḍ lecɣal meqqren, ad tmagreḍ at lḥirfa, ur k-yettawi igenni, ur k-tettawi lqaɛa, ad tleḥḥuḍ kan, ad tettakeḍ lxiḍ akka d wakka, ad tessirmeḍ ad ilint d tisegra tiseɛdiyin i uzeṭṭa ara yegren ad yekkes, di kra n ussan kan di Tizi Wezzu. Di tegnatin yecban tigi, a tessirmeḍ d tidet ad tebḍuḍ ɣef sin, yiwen d keč wayeḍ am keč akken ad tfarseḍ akken ilaq ayen ak i d-yettɛeddayen d isura ama d wid yettikin di timzizzelt n ixulaf n ssinima s tamaziɣt ama d wid yettikin di timzizzelt n uzemmur n uraɣ, kra cleqfeɣ-t-id, ssawdeɣ ḥedreɣ-as, kra yeffeɣ-iyi afus xas ulamma ḥsiɣ d ayen yelhan i d-iyi-iruḥen. Tayri, beṭṭu n wakal, tamurt, tilelli i yiles d yidles, tudert i yidir, tayemmat, lɣerba n tmurt d tikli ɣer uẓar, amɣar azemni, tira, ssinima, ccna d lmusiqa, yal asaru s temsalt-is. tikwal yewwet-aɣ wugur ticki akken nettabaɛ timcukkal ntettu isura i d-iɛeddan, tikwal nettsemmiḥ di tagi-nneɣ, almi “ula d yiwen ur d-yenni teqbaylit” i s-tenna temɣart-nni nneɣ, tikwal nettabaɛ, nsell, nettmuqul, nessibnin tamuɣli, neḥsa nezmer ad d-nesnulfu, limer kan ad nesdukel iɣallen-nneɣ s tikti, s tedrimt, s lebɣi, ad nexdem isura am wid-nni neɣ xir n wid-nni i d-nerra ɣer teqbaylit…Ihhh! I bab n usaru n tewrirt yettwattun, yerza asalu, icebbeḥ-d tagnit, limer kan ad nedfer lǧerra-s, ur ttwattunt ara tewririn, ad teḥder Baya, ad yerr wedrar-is ṣṣut! Ssinima d temlilit n imeɣnasen ilibiyen yettfeggiḍen d amennuɣ ɣef yidles amaziɣ, d temlilit d tneɣmasin titunsiyin irefden caɛlalu n umennuɣ n tlawin…Tizi tcebbeḥ s wunuɣen, s tugniwin n tmurt, s tuɣac ujeǧǧig, s tikli ɣer zdat skud iɣallen dduklen, di tmurt n leqbayel.
Zira