Akken kan tebda la d-tettuγal tsertit s annar, bdan-d la d-srusun tamsalt n tmaziγt γer lmisa. Amezwaru d Belkhadem i tt-ileεben linguiste imi d-yenna ilaq tamaziγt ad tettwaru s yisekkilen n taεrabt. Limer d i terbiḥeḍ ay ul,tili yiwen am netta ur yesεi ara lḥeqq ad d-yefk rray-is. Llant kra n temsal anda ur yettunefk ara lḥal i umadan ad d-yini ayen yettxemmim fell-asent imi dayen i t-yexḍan, ur t-teεni ara teqsiṭ. Meεna akken i as-yenna winna :’’win i d-yekkren ad yesgemmber, ad d-yas γur-neγ ad yecnu’’. Yusa-d armi d talemmast n Ğerğer, yeslex di tmaziγt armi yeεya, rnan-as s ufella afus, ‘’ad ten-ixdeε Rebbi’’. Acu kan, tin i tent-yessagren akk d tinna n Djabellah mi d-yefka rray-is γef Yizzayriyen : ma d Aεraben neγ d Imaziγen. Ula d wagi yerra iman-is d amusnaw neγ εad d amγar azemni. Yenna-d :’’ nekni imi nhedder s taεrabt, ihi d Aεraben, meεna maεlic imi tamendawt (constitution) testeεref s tmaziγt.’’ Meḥsub tamaziγt tella, Imaziγen ulac-iten. Win iheddren s taεrabt d Aεrab, win iheddren s tmaziγt mačči d Amaziγ. Ruḥ fhem-itt kečc tura. Lumeεna d acu ara tfehmeḍ γer win yettawin taqabact γer tesdawit asmi yettruḥu γer din. ‘’Tekk a weεdi’’. Limer d i ak-terbiḥ ay ul,di&gamma,; tili netta d wid i t-yecban ur ttuγalen ara d Izzayriyen alamma buṭin fell-asen Yimaziγen ma ad ten-qeblen di tmurt-a neγ ala. ‘’Aεidiw n baba u jeddi, rniγ rrekba γer deffir’’.
Hocine.M