Sya d asmekti nnsen, sya d asebded, i tikelt tamezwarut di tmurt-nneɣ n tesqamut n tzuri d tsekla, i rujan inazuren acḥal-aya. Amer ahat ad ffɣent tirga-nnsen ɣer lxir di tmurt n lxali, tamurt n iseflan d iɣeblan , tamurt degi neqqen warrac llakul iman-nnsen imi yiwet n taluft ur asen-tban, tamurt iḥeggfen acḥal d afennan almi ten-tneqq ula d tizi n wedfel, tamurt ur nefki azal i usnulfu, i ccna d usefru…Nurga, nesɛedda tanafa, nuki-d waqila tbeddel fell-aɣ : ad tili tkerḍiwt n unazur, ad yesɛu amur di tmurt-is, ad banen izerfan-ines, ad ifak ččiɣ-k teččiḍ-iyi. Akka ara s-dduklen iwaziwen : Mas Abdelkader Bendaamache (i lmendad d amusnaw n lmusiqa, d imḍebber amezwaru n tfaska taɣennawt n ccna n ccaɛbi), ad ilin immetlen n tneɣlaft n usexdemd tneɣlaft n yidles, ɣer tama nnsen aṭas ifennanen yefkan ak tudert-nnsen i tẓuri d tsekla : Bahiya Rachedi (Tetturar deg isura), Sonia (tetturar amezgun), Yamina chouikh ( tessufuɣ-d isura), Zoubir Hellal ( Anaẓur n teklut), Brahim Behloul ( D anaẓur n ccḍaḥ), Zineb Laaouedj (Tamyarut), Nacira Mohemmedi ( Tamedyazt), Larbi Zeggan ( Kamel Hemmadi acennay ameqran), Hamidou, Samira Negrouche (tamedyazt), Said Boutadjine ( d amnadi). Sif ay aɣerbal sif, win i tt-yesɛan deg yidammen, win itewlen ad d-yawi amur-is : d ccan, d leqder, d adrim!!! Wissen anwa i tt-yufan akka yugi-tt?! Nɛeṭṭel, almi i nemḍel acḥal d anaẓur, kra kan akken d imuduren, kra nessekfal-d iɣsan nnsen yal tikelt amek, ula d Zerrouki Allaoua, bu ṣṣut n uwaqur, bu ccna ḥlawen yezzuznen at lɣerba n tmura n medden d wid n tamurt, ur yufi win ara d-yawin iɣsan-is ɣer tmurt almi yuɣal d iɣed nni ara yeddem waḍu n tatut, akken tenna Malika Domrane. D tagnit i umedyaz, i umyaru, i yat umezgun d ssinima, i inaẓuren akken ma llan ad d-neṭqen, ad d-inin i ten-iqerḥen, ad d-inin i ten-yeskuffren, i sen-yerẓan ifadden, d tagnit ad myeɛqalen at lḥirfa, ad ifru lḥebb ɣef walim, ad yuɣal wazal i kra yellan d utwil, i kra n win i wumi tella deg yidammen, deg ul, i wid i tt-yettarun, i tt-yemmalen, i tt-yessidiren, taẓuri nni!
Zira