Ilmend n usmekti n umulli wis 32 n Tefsut Imaziγen, tessewjed-d terbaεt umi sawalen « Los Angeles Film Festival Amazigh » n tmurt n Marikan yiwen n leqdic adelsan ara d-yilin deg uxxam n Ugraw n Yiγeṛfan Yedduklen(ONU) di temdint n New York deg ass n 27 yebrir i d-iteddun. Leqdic-a ad yili deg-s uskan n yisura untimen( films documentaires) yerzan amezruy d leεwayed n yimaziγen, gar-asen win i texdem Dounia Ben Jelloun « Aẓeṭṭa di tmurt n Rrif » d « lebni γer yimaziγen » akked « wid yettwattun di Tsammart » sin-a n yineggura d isura i xedmen yinelmaden n uγerbaz n ssinima n Ouarzazate(Lmeṛṛuk). Γer yidis n ssinima, ad tili yiwet n tmeγṛa n ccna n tmaziγt ideg ara ccnun sin n yinaẓuṛen imaziγen yettidiren di Marikan, wi d : Khalid Izri akked Fella Oudane. Am akken daγen ara d-tili yiwet n temzikent n tewlafin(tṣaweṛ) n tmurt n Tmazγa i yexdem unaẓuṛ Noureddine El-Warari. Aya akk mebγiṛ leqdic amerkanti ara d-yilin di temdint n Los Angeles deg ussan n 21 d 22 yebrir. Wid i d-yessudsen leqdic-a yesεan azal azamulan(symbolique) ladγa imi d tikelt tamezwarut ara d-yili ussisen n yidles amaziγ deg uxxam n Ugraw n Yiγeṛfan Yedduklen, fkan-d tiγri deg yiwen n walγu i d-yessufeγ lsit n lantirnat amazighnews.com, ideg d-necden imdanen akken ad d-asen s lqewwa γer ttiεad-a adelsan.
Mokrane Chikhi