“Acemma ɣer deffir di Lmerruk d Batna”
Tella-d di tesdawit n Tubiret temlilit tagraɣlant ɣef uselmed n tutlayt tamaziɣt di tesdawiyin tazzayriyin d tberraniyin. Timlilit-a iheyya-tt-id Ugezdu n Tutlayt d Yidles Amaziɣ n Tesdawit Akli Mohand Oulhadj. twencden-d ɣer cɣul-a isdawiyen si Maroc, Fransa (Inalco, Corse), Bgayet, Tizi ouzou, Batna d Tubiret.
deg wass amenzu d Youcef Nacib d-yefkan asarag amezwaru. yemeslay-d ɣef “ɣef uselmed n tmaziɣt deg uɣerbaz agraɣlan azzayri n Lpari : tirmit n wazal n ɛecra n yiseggasen”. Syin akkin d Kamal Nait Zerrad d-yennan d acu i d “azal n useqɛed n teqbaylit deg uselmed” . Dima di tsebḥit n wass amenzu n temlilit, d Mohand Mahrazi, si tesdawit n Bgayet, ara d-yefken asarag-is s usentel : “anta-tt tira ara iselḥen i usnerni d uselmed n tutlayt tamaziɣt”.
Tameddit n wass, isaḥ-d wawal Kenzi Azeddine, si tesdawit n Tizi Ouzou. Netta, yemeslay-d ɣef “tirmit n uselmed n la socio-anthropologie deg ugezdu n tmaziɣt n tesdawit n Tizi ouzou” . Ma d Mohamed Djellaoui, anemhal n ugezdu n tmaziɣt n Tubiret yefka-d rray-is ɣef : “tirmit n n uselmed n tmaziɣt s tmaziɣt di tesdawiyin n Lezzayer, ladɣa deg ugezdu n tmaziɣt n tesdawit n Tubiret”. Si tama-as, Said Chemakh yemeslay-d ɣef “uselmed d unadi di temsalt n tmaziɣt, si 1990 ar ass-a”.
Ass aneggaur n Temlilit isaḥ-d wawal i yesdawoin d-yerzan si Maroc. deg wayen i d-nnan, yufrar-d belli aselmed n tmaziɣt di tmurt-nnsen yuɣal acemma ar deffir. Rnu, tura di Lmerruk, tamaziɣt tuɣal d tunsibt. Aɛewwiq-agi yella daɣen di Tmurt n yicawiyen, ɣef akken d-yufrar daɣen deg usarag d-tefka Habiba Boudraa.
S.O.A