Taɣiwant n Leɛǧiba tesfayda-d deg wussan-a yezrin s yiwen n usenfar i ttrajun acḥal aya yimezdaɣ, ladɣa inelmaden n temnaḍt-a. Ihi, d lebni n yiwet n tesnawit i mmugren s lferḥ, tin ara yessifsen taɛkemt ɣef waṭas n yinelmaden i yettruḥun yal ass alamma d Bechloul. Ɣas ulamma imḍebbren n tɣiwant gan-d akka ttawilat n usiweḍ i yinelmaden, maca sin n lkiran yellan ur zmiren ara ad awin akk inelmaden, imi timnaḍin n tɣiwant-a zgant ferqent yerna mbaɛadent. Iwulem daɣ ad d-nini dakken asenfar-a d win ara yesneqsen lḥers ɣef tesnawit n Bechloul, imi tagi ara yettwabnun di Leɛǧiba ad ilin deg-s azal n 800 n yimukan n leqraya, anda 200 ad sfaydan s tirent n yimekli.
S. M