Ddurt yezrin, yekker ccwal di lberlaman n tmurt n Ukṛaniya ger nnewab n tama taẓelmaḍt d wid n tama tayeffust γef lǧal n usenfar n usaḍuf yerzan aẓayer(statut) n tutlayt tarusit di tmurt-a. Nnewab imεaṛḍen kkren-d deg waṭas yid-sen mgal asenfar-a i d-yessumer γer tefranin uselway Viktor Ianoukovitch i yebγan ad yerr tutlayt tarusit d tutlayt tunṣibt tis snat zdat n tutlayt tukṛanit. Nnumab n tama tazelmaḍt ur neqbil ara asenfar-agi, sbegnen-d reffu-nsen s lqewwa zdat n nnewab n tama tayeffust i yebγan ad t-sεeddin imi d nutni i yeṭṭfen tuget n yimukan di lberlaman. Γef wakken i d-tewwi lexbar-agi tesnurayt taneγmast AFP, « di tazwara nnuwab yettemxaṣamen mbadalen rregmat armi kan i sen-yuγal d imenγi s yifassen, yiwen seg-sen yettwajreḥ yekcem γer sbiṭar ». Tadyant-a teǧǧa aselway n lberlaman ad iwexxer asenfar-a i yellan d sseba n ccwal γas ma nnewab n tama tayeffust bγan ad εiwden anejmuε fell-as ddurt-agi. Akken ad nesmekti, tiririt n trusit d tutlayt tunṣibt tis snat di Ukṛaniya, yella d yiwen seg lewεud iss yewεed uselway n tmurt Viktor Ianoukovitch wid i t-iḥemlen uqbel ad iεeddi d aselway, rnu γur-s di tmurt-a ideg yewweḍ umḍan n yimezdaγ γer 46 imelyunen, aṭas seg-sen i yettmeslayen tarusit i yellan yakan d tutlayt tunṣibt n tmurt di tallit ideg tella d amur deg Tdukli Taṣubyatit.
M.C