Seg ccukat-nni werǧin ɛefsen yiḍarren i d-yettwali am usigna, tikwal yella tikwal ulac-it. Yessenṭaq-d tasusmi yeṭṭsen deg yilsawen ɣer wanda yesmar tiṭ-is. Mačči d menwala! Ɣas ma imdanen akk am netta, d acu kan ifaz s tmuɣli-s yettḥulfun i yiẓra tettrun, yettwalin tiqit n yimeṭṭi ɣef leḥnak n wid mazal ttrun, yesraḥayen ijeǧǧigen deg unza n wansayen, ceɣbent-tt tirga n tidet akk d usugen i d-yettefruruxen seg tmetti-s, d ayen yellan neɣ dayen nniḍen, netta ur d-yecqi ara. Yebna axxam n sselṭan, yesmar sser-is ɣef yiɣerban, yettales-d taqsidṭ-is s yisekkilen war laṣel, mačči drus, neɣ ma tezgel-it tudert, netta d azgen n Urebbit ɣer lejdud n bu sin yiḍarren.
D amdan yettcebbiḥ tudert, ɣas yettidir gar tuɣmas, tetteffeẓ-it tikti-s yal ass, d netta kan i izemren ad d-yesnulfu, ɣur-s targit d tidet,tidet d targit. Timura yessnen lqima-as, yes i bennunt llsas, ttfarasent axemmem-is akken ad yennerni ccan-nnsent. Ɣur-neɣ, amzun nektal tikerrusin yettcuddun tilelli, ma nennuda ad naf tuget n yimdanen deg tmetti-nneɣ d inaẓuren, axaṭer ttruẓun asalu s tilin-nnsen mebla ma ǧǧan-d cwiṭ n ugerruj di tẓuri, ɣas llan wid i d-yeǧǧan, ma tnudaḍ ad tafeḍ cwiṭ, neɣ ad ak-inin mačči ass-a. Deg tira neɣ di tsekla s umata, iberdan d ikeddaren, win i d-yuran kra ad yegrureb, di teklut teḥzen tedwat, amzun teḥjeb, seg tikelt ɣer tayeḍ, nettaf kra n tugniwin ɛellqent deg yixxamen n yidles, maca bab-is ulac-it, ahat yesseḍḥa imi netta d anaẓur !? D anaẓur war izerfan, d anaẓur gar yiberdan, mazal ur t-yedduri ssqef, yettargu tirga n lhiba s tuffra, axaṭer wid i t-id-yettwalin qqaren-as « mačči d bab-is », yettali sebɛa n yigenwan deg uḍar-is qqnen-d amrar, ma yettu ur yeckenṭeḍ ara, ad t-id-zzuɣren d aksar. D wa i d anaẓur ɣur-neɣ !?
Rḍel-iyi-d tiṭ-ik, akken yes ak-id-waliɣ, ahat ad ak-fkeɣ amkan ! Rḍel-iyi-d imeslayen, akken ad ak-d-sniɣ tazrart s lmerǧan n tmurt-nneɣ, ahat ad ticbiḥeḍ yes ! Efk-iyi cwiṭ seg tmuɣli-k akken yes ad ddadceɣ, ahat ad awwḍeɣ s anda leḥḥuɣ ! Telliḍ neɣ ulac-ik ? Nṭeq-d kan ad ak-id-sleɣ, akken ad ɛelmeɣ telliḍ, ahat ad ferḥeɣ yes-k ! Ay anaẓur…
Salim Benkhelifa