Kra n wussan kan i aγ-iferrqen akked lεid amaḍlan n warrac i d-iṣebbḥen yal aseggas deg wass n umenzu n yulyu. Ixulaf-agi n uzekka, taswiεin nettaf-d seg-sen wid yufraren ger wiyaḍ, wid yessewhamen s tḥerci d leqfaza i yellan deg-sen. Ikhloufi Rayane d yiwen n umedya ger wiyaḍ, netta yemmal γer tẓuri, yessunuγ kra n wayen walant wallen-is yerna akken ilaq. Rayane, di lεemṛ-is ala 10 n yiseggasen, netta d anelmad n useggas wis ṛebεa n uswir amezwaru. Ilemmed deg uγerbaz n Al Ikhoua Souada Taklit i d-yezgan deg temdint n Leqser(Bgayet). Aqcic-a abenkaḍ(lmuεǧiza), iṛessem kra n tfelwit i iwala yerna akken tella di tilawt i tt-id-yettarra deg unuγ; ama d tawlaft neγ taγlaft n udlis, agama, kra n tγawsa i iwala ad tt-yeṛsem s ufus-is yettwamelken s lesrar n tẓuri. Γef wakken i aγ-d-yenna yiwen seg yiselmaden-is mass Kennouche Younes: » Rayane, d anelmad yemgarad γef wiyaḍ, yesεa lewṣayef n unaẓur ameqqran, ur yessugut ara tameslayt deg tneγrit yerna yeqfez di tγuri. Nnig n waya, iḥemmel tamaziγt ugar n wakken i iḥemmel tutlayin-nniḍen ». Mebla ccek, Rayane llant deg-s tmitar(licarat) n unaẓur n uzekka, d assirem i tẓuri, i warrac-nneγ meṛṛa yal wa acu yesεa d tizemmar i ss d-yufrar, uklalen akk asebγes d lemqadṛa.
Mokrane Chikhi