Akken kan ara ak-tefk tewwurt γer daxel n uγerbaz-a, ad ak-id-yuγal ciṭ n usirem γef uzekka n tmurt-nneγ : ad as-tiniḍ ziγ mazal lxir γer sdat. D acu-tt tezdeg-nni ! D acu-tt ttrebga-nni n yixeddamen neγ n yiselmaden ! D acu n leqder-nni yellan gar yiselmaden d yinelmaden neγ εad gar-asen d tnemhalt-nsen Massa Ibawen. Dγa, γef sser n wayagi, nemlal d tnemhalt n uγerbaz-a, s lferḥ ameqqran i aγ-terra γef kra n yisteqsiyen.
Aγmis n yimaziγen : d acu n sser i yeffren, dγa, deg uγerbaz-a ?
Massa Ibawen :’’aγerbaz-a, yella d amedya si zik. Ğğan-t-id yirumyen. Yesεa leεwayed di leqdic-is. Ihi nekk εerḍeγ ad dduγ deg ubrid-a. Ḥesbeγ-t d axxam-iw daymi i d-yufrar akka.’’
Ahat imi d tameṭṭut i telliḍ, yettεawan neγ yessishel lecγal deg uγerbaz amenzu ?
Ahat, acu kan mačči daya kan. Nekk, leεmer ḥesbeγ iman-iw d timḍebbert, ad rayiγ weḥd-i. Nekk ttwellihe&gamma,; ttweṣṣi&gamma,; ttcawareγ. Nxeddem d agraw. Akken i as-nnan Wat zik ‘’Imensi γef wayeg mcawaren Wat uxxam, yettibnin’’. Yerna mi ara txeddmeḍ lḥağa s lebγi, ala aṣeggem ara tṣeggem. Akken i awen-d-nni&gamma,; aγerbaz-a d axxam-iw, inelmaden-is d arraw-iw. Ihi daya i yeğğan aγerbaz-nneγ ad d-yifrin si yal tama, ama di leqraya, ama di tezdeg neγ deg wayen-nniḍen.
Nwala ula d taselmadt-nni n tmaziγt, Massa Belhocine, ḥemmlen-tt aṭas yinelmaden-is. Acimi ?
Taselmadt-a, ḥesbeγ-tt am yili. Ldiγ-as akk tiwwura. Tamaziγt d tutlayt am tutlayin-nniḍen. Ass-a inelmaden-nneγ ḥemmlen tamaziγt axaṭer ḥemmlen taselmadt-nsen. Ihi d wa ay d sser n uselmed : ilaq ad ak-ḥemmeln yinelmaden ma tebγiḍ ad teslemdeḍ.
Awal aneggaru ma tebγiḍ
Xas akka xuṣsen-aγ ttawilat, meεna nqubel tagnit akken iwata. Nekkat, yal tikelt, i wakken ad nefk udem igerrzen i uγerbaz-agi-nneγ. Lakul-a, d azamul n tirrugza, n tebγest. Xas nettuεetteb, meεna nemger-d lγella s wayes ara nezdi lqedd. Icebba-yi Rebbi d ta i d tajmilt tameqqrant ara as-nerr i tin yewwin isem n uγerbaz-a ‘’Saliha Ouatiki’’ imi nettat tefka tudert-is d tameẓyant (12 n yiseggasen) : di tmesbanit-nni n 11/12/1960 i tt-nγan di Lezzayer.
Tanemmirt i uγmis n yimaziγen i d-yerzan ass-a γur-neγ.
Hocine.M