I tikkelt tis mraw (10), ta deffir ta, theyya-d tiddukla « Project’heurts » timliliyin n usaru, deg tzeqqa n usaru n temdint n Bgayet seg wass n 09 almi d 15 yunyu 2012.
Tiddukla-ya « Project’heurts », tqeddec ugar deg useɛten neɣ askanay n yisura akked umeslay fell-asen s tiṭ n yimusnawen akked yimferǧen. (projection et critique cinéma).
Aṭas n yimdanen i d- yerzan ilmend n tedyant-a, gar yimferǧen d yinebgawen llan wid i d- yusan ula seg tmurt n berra , akken ad walin, ad mmeslayen anagar ɣef usaru. Ugar n 30 n yisura deg wahil n temliliyin-a i d-iɛeddan, gar yimeẓyanen d yiɣezfanen. S umata, aṭas seg-sen sɛan aswir ɛlayen, wiyaḍ zgan-d kan ! Timliliyin-a bdant iḍ n 09 yunyu ɣef 20hh00 s usaru yettawsnen, “La chine est encore loin” n Malek Bensmail.
Tikkelt-a daɣen, tella-d yiwet n temzizelt ideg kkin wid yettarun iḍrisen n usaru (scenarios), dɣa, wid i d-yufraren tefka-asen tiddukla-a tagnit akken ad ten-slemden, ugar wayen snen ɣef tira n uḍris n usaru. Inelmaden bdan ulmud-nsen seg wass-nni amezwaru n temliliyin-a s lmendad n kra n yiselmaden izzayriyen d wiyaḍ i d-yusan seg tmura n Fransa (Canal France International-CFI) d Tunes.
Ayen i d-ijebden lwelha ɣer taggara n temliliyin-a d tirza n yiwen gar tgejda n usaru Azzayri, wa d Merzak Ɛalwac (Merzak Allouache). Akken kan i d-yuɣal seg « Tfaska n Cannes » deg tmurt n Fransa, anda i d-yewwi yiwen n warraz ilmend n usaru-ines aneggaru « Le Repenti ». Merzak Allouache, yesken-d i yimferǧen n Bgayet, sin seg y isura-ines ilmend n temliliyin-a « Le Repenti » d « Normal » ussan n 13 d 14 yunyu 2012, yerna yemmeslay-d fella-asen ɣer taggara. Akken daɣ i d-yemmeslay ɣef uɛeddi-ines deg « Tfaska n Cannes ».
Ɣer taggara, ad d-nini dakken timliliyin-a n usaru di Bgayet, simmal teddunt, simmal ttimɣurent ugar deg usnerni n usaru Azzayri akked yidles d tmetti sumata.
Samir At Buɛza.