Ilmend n usmekti wis 14 n tmenɣiwt n tgejdit n tẓuri d uzamul n umennuɣ ɣef Tmaziɣt d Timmuzɣa Matoub Lounes yettwanɣan deg wass-nni amcum n 25 yunyu 1998, ilmend daɣen n usmekti wis 14 n tmenɣiwt n yilemẓi Salhi Redouane mmi-s n taddart n Sidi Ayad, i d-yellan deg wass n 27 yunyu 1998 sin n wussan mbeεd timenɣiwtt n Lwennas; tassewjed-d tdukla tadelsant « Tafat » n Sidi Ayad yiwen n leqdic iss tebɣa ad terr tajmilt i sin-a n yimeɣrasen, ladɣa Salhi Radouane iṛuḥen di lbaṭel akken kan i d-yewweḍ ɣer tewwurt n ddunit, imi di lεemṛ-is imiren ala 22 n yiseggasen. Γef wakken i aɣ-d-xebbren yimḍebbṛen n tdukla « Tafat », ad tili temzikent ideg imezdaɣ n Sidi Ayad zemren ad walin ttṣaweṛ ama d tid n lmeṛḥum Salhi Radouane neɣ tid n Lwennas d wayen akk icedden ɣer leqdic-is akked umennuɣ ɣef tmaziɣt d tugdut s umata, ma deg wass n 27 yunyu, ad tili yiwet n tmeɣra meqqṛen ideg ara ccnun waṭas n yicennayen. Akken ad nesmekti, Salhi Redouane, nɣan-t yiǧadarmiyen n Sidi Aich mi yella deg tmesbanit ideg d-sbeggnen yimdanen lɣiḍ-nsen ɣef tmenɣiwt n Lwennas, iṛuḥ d asfel am netta am wiyaḍ yettwanɣan di temnaḍin-nniḍen n tmurt n Leqbayel, wi d Aït-Idir Rachid , Ouali Hamza ad ten-yeṛḥem Ṛebbi akken mallan.
Mokrane Chikhi