Llan sin yiεeṭṭaren akken kan i ddukkulen, seg wakken myeḥemalen aṭṭas uγalen am sin yiḍudan ufus, ula d lwaεda mi asen-d-ttunefk wa ittbuddu wayeḍ s uḥric ilhan, γas akken lḥif itebεi-ten γelben-t s tayri illan gara-asen, iwweḍ-d lajel n yiwen seg-sen immut. Iqqim-d wayeḍ d ameḥzun weḥd-s, lexyal n urfiq izga di yal amḍiq, ittmekti-d leḥmala-nni d teḍsa-nni illan zik ansi ara d-tekk?
Yiwet n tikkelt ileḥḥu ataya imlal-d yiwen uεeṭṭar meẓẓi fell-as, inṭeq-d γur-s:-Mselxiṛ.
Irra-yas:-Mselxiṛ.
Aεeṭṭar ameẓyan:-Ma ulac uγilif bγiγ ad dduγ yid-k xeṛsum a nemwanas.
Aεeṭṭar-nni imekta-d bab-is, yuγal iqbel, ddukklen di sin, almi d tameddit nsan di lğameε n taddart.
Yiwen n umγar iwwi-yasen-d imensi ad ččen, isers-d gar-asen taqedduḥt n zzit, tayeḍ n tazart d teḥbult n uγrum, akken kan iffeγ umγar-nni, aεeṭṭar-nni ameẓyan immeγ γef iniγem-nni ilhan, dγa argaz-nni ameqran, imekta-d tayri iruḥen, ifhem belli ur d-tettwaγram, iḥbes lmakla.
Aεeṭṭar ameẓyan:-Ayγer akka?
Argaz:-Ečč kan s tezmert inek nekk ṛwiγ.
Tasebḥit inṭeq urgaz γer uεeṭṭar ameẓyan:-Ay arfiq.
-Anεam.
Argaz:-Ruḥ ad isahel Ṛebbi fell-ak nekk d awḥid ara kemmeleγ.
Yeḥya Yanes.