10 kilu n lkif daxel n tkerrust di Tubiret !
Qqaren zik-nni dakken ttar neɣ taxazabit yettili-d deg wass n tmeɣra ! Akka dɣa I texdem yiwet n terbaɛt n rebɛa n yimdanen ass n tmeɣra taɣelnawt n yimsulta.
Taluft teḍra-d lewhi n uzgen n yiḍ, mi akken ilmeẓyen-a yessawḍen di leɛmer gar 26 d 30 n yiseggasen, zedɣen deg Lezzayer tamaneɣt d Boumerdès, nwan imi d tameɣra n yimsulta ahat ad terxef acemma lɛessa. Dɣa, usan-d di snat n tkerrusin anda I d-glan s 10 kilu n lkif.
Ɣef leḥsab n wayen I d-nnan imsulta, sselɛa-agi d tin ara yenzen di Tubiret deg waggur-a n remḍan. Tamsulta yettabaɛen taluft-a s lqerb d tin yebɣan ad taf abrid ɣer tala, akken I qaren, iwakken ad d-tbeggen widen akk iteddun deg ubrid-a n usiksel d lbiɛ n lkif di Tubiret.
2,5 Kilu daxel n tcekkart !
Mačči d tadyant-a n 10 kilu i d tamezwarut ! Deg yimalas yezrin, mi akken kan I yebda remḍan, imsulta I d-yelhan d tlufa n lehyuf ur tezgil ara yiwet n tcekkart yersen deg unebdad n lkiran n Tubiret. Mačči d kra n terzeft I yersen daxel-is, maca 2,5 kilu n lkif I yettwafren daxel-is. Ulamma imawlan-is ur d-banen ara, meɛna iban mačči d ayen ara idergen ɣef yimsulta I yettnadin melba aɣfal ɣef wid ixeddmen aya.
90 n nneqlat n lkanabis deg At Walban !
D iǧedarmiyen n tɣiwant n Saharidj di M’chedallah I yeṭṭfen yiwen n umezdaɣ n taddart n At Walban yesɛan azal n 31 n yiseggasen di leɛmer-is yeẓẓa yiwet n tebḥirt n lkanabis anda isers azal n 90 n nneqlat seg-s. Amdan-a, yextar yiwen n umkan ur neshil ara I tiffin, imi yezzi-as –d ukermus, iwakken ad yessebɛed tiṭ n madden s wayen yellan daxel. Daɣ, ula d amkan-a aṭas I ihujren seg-s, meḥsub qrib yexla seg yimezdaɣ-is. D ayen I t-yeǧǧan yexdem mebla akukru d uɣilif. ɣef leḥsab n yisallen I aɣ-d-yewḍen, amdan-a ur yeqniɛ arak an s wayen yexdem deg umkan-a idergen, maca yerna yeẓẓa 10 n nneqlat n ṣṣenf-a n lehyuf tama n uxxam-is. Imi I d-iban akk wayen akka yexdem, ssawḍen yiǧadarimyen n Saharidj amdan-a ɣer yifassen n creɛ I t-yerran akka ɣer lḥebs n Tubiret segmi ara yettucareɛ. Ad d-nini belli taxazabit-a yendi umdan-a d tin ara d-yawin lehlak d lemḍerra tameqrant limer ur yettwaṭṭef ara, acku lukan yessaweḍ ad d-yekkes ayen akka yeẓẓa, aṭas n yilmeẓyen ara iruḥen d asfel.
341 n yigramen n lkif di Bgayet :
Iɣallen n laman yettukelfen s umnaɛ n lehyuf ṭṭfen sin n yimdanen deg waggur yezrin tama n Sidi Ahmed snuzuyen lkif akked tkinatin yettumenɛen. Imdanen6a yellan yakan ttwasnen s wannect-a ɣlin-d di tefxet I asen-ndin yiɣallen n laman iwakken ad ten-ṭṭfen – akken I qqaren- afus deg uḍellaɛ. Dɣa d ayen uɣur ssawḍen yimsulta I ten-yewwin s axxam n creɛ. Si tama-s, aneggaru-a yerra-ten ɣer lḥebs s tuhma n uksab d lbiɛ n lehyuf.
12 n kilu n lkif I yettwaṭṭfen di 6 wagguren imezwura n useggas-a di Tizi Ouzou:
Tamdint-a n Tizi Ouzou d tin ur nemniɛ ara seg waḍu n lehyuf I d-isuḍen am uɛeǧǧaǧu. 12 n kilu I ssawḍen yiɣallen n laman ad t-id-ssukksen si gar yifassen n wid I t-yesnuzun. Ɣef leḥsab n yisallen I d-ssawḍen yiɣmisen yemxallafen, “lɣella” n useggas-a tufrar ɣef tin n useggas yezrin. Ɣas akka lɛassa mačči d tin irexfen, maca ttjara d usexdem n lehyuf simmal yettaɣ aẓar di tmurt, rnu ɣer waya, lkif d netta I yeṭṭfen taqacuct deg leḥyuf ssexdamen madden ladɣa ilmeẓyen.
S. M