Azal n 500 n yixxamen i yesfaydan di sḍis n wagguren imezwura n useggas-a s lgaz n temdint, mi akken qqimen i lḥif d usemmiḍ acḥal-aya. Tudrin-a iɣer yewweḍ uqadus n lgaz d tid yellan d timeṭṭurfa di tama n usammer n twilayt n Tubiret. Ad naf 35 n yixxamen di Maksim, i d-tḥuza tɣiwant n Ɛǧiba, 180 di tama n Haizer deg taddart iwumi qqaren Tiɣilt n Seksu. Ma d 283 ineggure d wid yellan di Tiɣzert n Braham, yezdin ɣer tɣiwant n Teɣzut.
Ɣer tama n tlata n yisenfaren-a, ad naf akka di tama n La Crête-Rouge, yiwet n taddart seg tudrin n Ɛǧiba bdan deg-s lecɣal n ucuddu n wazal n 400 n yixxamen s aqadus n lgaz n temdint.
Asenfar-a, yusa-d akka s kra n leɛḍil, imi ɛeddan ugar n sin n yiseggasen segmi i ilaq ad yettwaxdem, mi akken asenfar yebda-d seg tɣiwant, yezger-d i wasif ɣer Hagui d semmache. Imaren dɣa i t-rǧan yimezdaɣ n taddart-a, maca imḍebbren terza taluft-a rran di rrif asuter n yimezdaɣ i ǧǧan di ṭṭmeɛ d usirem almi d lawan-a.
Wicqa ! laẓ yeweɛduyen ur ineq, akka i teḍra d yimezdaɣ-a, imi asenfar yewweḍ-d ɣur-sen.
S. M.