Seg wakken di tmurt n leqbayel εziz wakal, armi aṭṭas n temsal i iḍerrun, ger yimdanen, armi menγen ula d irgazen γef tlisa, dγa ula d Ccix Muḥend iqubel aṭṭas n ddεawi icban aya degmi i s-iqqar:
La ttnaγen medden γef tmurt
Ur iẓri ḥedd wi tt-ilan
Nekni nettalas deg-s ala lqut
Netta bab-is d sselṭan
I nekni tegguni lmut
Leqrar nneγ d iẓekwan.
Qqaren, yiwen wass sin yimdanen, llan d lğiran, yiwen seg-sen d ṭṭame&epsilon,; iγil ad izdeγ lebda di ddunit, ad yeğğ lğaṛ-is ad iγfel, ad iẓẓiẓ talast a d-iḥeṛ cwiṭ n wakal, lğaṛ-is d uḥdiq ifaq maca isusem, ṭṭameε yugi ad iṛwu, simmal irennu iẓaẓay di tlisa ; armi isaweḍ azal n xemsa lmitrat s teγzi deg yiger.
Yiwen wass lğar-is uḥdiq, iddem-d iččuṛ tacekkart uqenṭar s wakal iccud-itt iğğa-tt.
Isawel-as iffeγ-d ṭṭameε inna-as i wuḥdiq: -Anεam a lğar?
Lğar uḥdiq: -Bγiγ kan a k-ḍelbeγ ad iyi-tεiwneḍ.
Lğar ṭṭameε: -Ulac uγilif ak-εiwne&gamma,; d acu tebγiḍ?
Lğar uḥdiq: -Ad iyi-tawiḍ tacekkart-inna n wakal s axxam, nekk aql-i uγeγ-tent deg
azagur-iw.
Iruḥ lğar-nni ṭṭameε ittaεaraḍ ad tt-irfed ur izmir, awah ay aḥbib wagi d awezγi, lukan s-zmireγ mačči d aγilif.
Yuγal inna-as wuḥdiq-nni: -Annaγ a lğar amaεzuz, yiwet n tcekkart n wakal ur as-tezmireḍ ara, tekkreḍ i xemsa n lmitrat s teγzi s tehri?
Inṭeq ṭṭameε: -Semmeḥ-iyi a lğar i wudem n Ṛebbi.
Yahia Yanes