Ilmend n usmekti wis 30 n tmettant n ucennay ameqqṛan Slimane Azem, aṭas n tdukliwin tidelsanin ama di tmurt-nneɣ neɣ deg umaḍal i yettheyyin ad as-rren tajmilt. Tikti n tejmilt-a tella-d di tazwara sɣur Tasbeddit (fondation) « Tiregwa « n tmurt n Kanada, i yebɣan ad yili wass n 28 yennayer 2013 d ass n usmekti n wayen akk yexdem ilmend n usbuɣer n yidles-nneɣ, unaẓuṛ Slimane Azem yemmuten ass n 28 yennayer deg useggas n 1983. S wakka, Tasebdadt « Tiregwa », ttettheyyi aṭas n leqdicat idelsanen ara yemmagen dinna di tmurt n Kanada. Ma di tmurt n Lezzayer, tidukla « Tadukli » n yinelmaden n tmezduɣt tasdawant « Aɛemṛiw » n Bgayet, theyya-d yiwen n wahil d adelsan ɣef demma ilmend n usmekti n tmettant n unaẓuṛ. Deg wahil i aɣ-d-mudden yiɛeggalen n tdukla-ya i ifernen tajmilt ad tili deg ass n 27 yennayer 2013 deg tmezduɣt tasdawant « Aɛemṛiw », ad tili deg-s : Timzikkent(exposition) n ttṣaweṛ, idebsiyen uddisen (CD), idlisen, atg, s uẓawan n Dda Sliman Ɛazem; Asenẓer(projection) n usaru n Mass AHMED DJENADI anda i tella Nna Ḥǧila, uletma-s n Dda Sliman Ɛazem deg taddart-is Agni Geɣran; Asarag-Askasi(conference-débat) akked Mass Abdennour Abdeslam; Tameɣra tameddit akked l’uṛkastr TILANIA s ddaw n tenmehla n umaystṛu ATMANE BELAID akked yinaẓuren n ccna: Yacine ZOUAOUI, Abdelakader BOUHI, Ferhat HAMDI, Souad HANNIZ. Ɣef wakken i aɣ-d-nnan yimḍebbṛen n tdukla “Tadukli” i d-nemlal di tmezduɣt tasdawant”Aɛemṛiw” n Bgayet, seg-sen mass Yacine Aberbour akked mass Hanafi Afroune:”Iswi n usmekti-ya i nebɣa ad nexdem, d aseḥbiber ɣef tgemmi(patrimoine) tamaziɣt, d tagnit akken ad issinen yinelmaden ladɣa wid n tesdawit n Bgayet, tigejda n tezlit tamaziɣt, Slimane Azem d yiwet ger tgejda-ya i yuklalen aṭas n tejmilt ilmend n wayen akk yexdem”. Ɣef waya, tidukla”Tadukli», tettraju deg akk inelmaden n tesdawit n Bgayet akken ad d-rzun s waṭas ɣer tejmilt-a ara d-yilin deg ass n 27 yennayer 2013 di tmezduɣt tasdawant “Aɛemṛiw”.
Mokrane Chikhi