Yeqqar ccix Muḥend U Lḥusin « taqbaylit mačči d lewrata, taqbaylit d aleqem u d aselqem ». Anamek n wawal iban : akken ur i tenneḍ wagu n tatut i yidles, akken tuccar n zzman ur ttḥazent ixef n tjadit, ilaq ɣer yal tasuta ad nulfun yirgazen, imusnawen, at tamusni ara s- ixelfen i ṭalqa n tasekla, i lewhi n tidmi ayen s wacu ara zgrent isaggasen mebla ma wacmen wussan ɣef udem-is iḍerfen n tawser. Ilaq asafu n usnulfu ad yettɛddi seg ufus ɣef ufus si ljil ɣer ljil akken times-is ad treq dima u d awezɣi yiwwas a texsi .
Da Maxluf n ubizar( deg At Jennad) yella seg widen i d- yewwin asafu si tasuta taqburt (tin yedren lḥif deg tela tutlayt-nneɣ d yidles-nneɣ) akken s wayen yellan d leḥrara deg ul-is a t-id yeṣiweḍ i yilmeẓyen n wass-a amer ad dlun ɣef yiḍeli nsen yerna as awɛun i uẓar n timadit-nsen. Ddew tacḍat n Tidukla tadelsent Yusef U Qasi, ulac tikelt deg ur yeḥḍir i tifaskiwin i d- yettilin s lmendad n tidukla-agi, akken ad yinni ayen yessen ɣef imusnawen i d-yeǧǧa wakal n tmurt n Leqbayel akked d izemniyen yessan ɣef taswin d ulawen lɣerẓa n taqbylit d inumak-is. Da Mexluf yerna ɣef ayen i d yugem d tamusni si zzman aqbur, asnulfu yeddan d lawan atrar. Isefra-s , yeččuren d aḥiḥa n tayri ɣer taqbaylit, ttalsen-d tiferiwin yenḍen i usɣar n tjadit, akken tiṭ mi iten-t teẓra, afuṣ ad yewɛu i tuksa-nsent mebla ma yeḥuẓa liqa is yellan d ṛuḥ.
Da Mexluf bab n wawal, bab n yiseɣ iḥamel ad yawwi ɣef umezruy n tamnaḍt n At Jennad. Lqibla-s d tifuɣalt anda yezdew umedyaz yerran sser ɣef imezdeɣ n tamnaḍt-agi Yusef U Qasi. Deg akken Da Mexluf yassen –as azal i wawal n Yusef U Qasi, mačči d yiwen neɣ sin isefra id yewwi fell-as. Di yal tafaska id tetthegi tidukla tadelsent Yusef U Qasi, ḥamlen imedyazen as- id zzin d agraw akken asen-id yawwi amud n wayen yura ɣef tamurt n leqbayel akked d tamnaḍt n At Jennad.
Akken as-tuɣal tajmilt yuklal, tidukla tadelsent Yusef U Qasi yesudsen timlilit ,deg tazeqa-ines, akken ad tesbedd tasqamut ara yillin d imesweqt fell-as i xemsa isaggasen-agi id teddun, tefka nnuba i iɛgalen-is akken ad rran d « aselway asehray /président d’honneur» Da Mexluf s timad-is. Ahat ɣef tizi n tmanyin ( 80) isaggasen di lɛemer-is, d ta i d tisemɣert yesarem acḥal aya u meddeḥ n Yusef U Qasi. Tura nnuba tettunefk-as s yiseɣ akked tumert.
Ait Slimane Hamid