Ass-a, ad d-yerzu ɣur-neɣ Dda Lmulud iwakken ad aɣ-d-yesmekti s ugerruj-nni yellan d lasel, d iseɣ n yal yiwen seg-neɣ. D ljedra n Lezzayer , anda yal azzayri ad yemmeslay i uzzayri i t-yecban yerna yal yiwen ad yeqbel lemgarda yellan gar-as d wayeḍ. Dda Lmulud yella, ad yeqqim i lebda d yiwen n urgaz ukyis, aḥnin iqerben s aẓar-is iwumi yefka tudert-is ama deg uselmed, di tira neɣ deg unadi. Isebbel tudert-is iwakken ad d-yessekfel taɣerma d yidles i qrib teḥwes tatut. D yiwen seg wid ur neqbil ad tegri tutlayt-is deg unnar n cḍeḥ, tin ara sseqdacen kan di tfaskiwin, imi yettwali belli d yiwen n ubrid ara yemḥun leqrun n umezruy. D ayen i t-yeǧǧan yuɣ timura iwakken ad inadi ɣef yidles-nni yegguni nnger yal ass imi yedder kan di timawit kan. Imi yeḥṣa d acu i izemren ad yeḍru d tsutiwin i d-iteddun, tid iwumi ttwakksent limarat, yekker Dda Lmulud ad inadi ɣef tliwa anda ara d-yagem ayen akk ara d-yessukksen idles seg tatut. Ur yeǧǧi timnaḍin wala imɣaren. Dɣa, yiwet n tikkelt, deg taddart-is, Tawrirt Mimun, yeqqim akka di tejmaɛt yettmeslay d yiwen n ufellaḥ iwumi qqaren Ferḥat At Uferḥat, i yesteqsay amek i xeddmen medden lmaɛwun d yismawen n wallalen-is. Ɣas akken Dda Ferḥat yerfa kra, maca yessedreg, yetterra-d ɣef yiseqsiyen. Segmi akken iruḥ Dda Lmulud, yezder Dda Ferḥat deg uxemmem, amek yiwen n ccix n lecyax yesɣarayen deg yiɣerbazen imeqranen yettawi-d tuttriwin yerzan lmaɛun d wallen n tfellaḥt ? Yessetbeɛ akka Dda Lmulud s tmuɣli almi yejba, yeskuki, yenna i yiwen: « ini-d, kečč yesnen aṭas n tlufa, d acu yeǧǧan Lmulud ad iyi-d-yesteqsi amek i xeddmen medden lmaɛun ? » Yerra-as : « Yebɣa ad yelmed ! » Dɣa din i yennerna reffu n Dda Ferḥat, yerran taɛekkazt ɣer deffir, yenna : « Limer ur d-tusiḍ ara d mmi-s n umeddakkel ad rẓeɣ iberḍiyen-ik, ur tettafeḍ ṭṭbib ara k-idawin ! » D ayen i yegguma ad t-yeqbel Dda Ferḥat, imi yettwali Dda Lmulud yejba yiswir-is akkin i tizi, maca yesteqsay ɣef tyuga d lmaɛun. Meɛna, d ayen i d-yessebganen ackenṭeḍ n umusnaw deg yidles-is d leɛwayed-is, ayen i d-yettawi seg yimdanen mačči seg yidlisen.
24 n yiseggasen-aya, mazal-it yedder gar-aneɣ, mazal nesquccuḍ-d seg wayen i d-yeǧǧa.
Ṭtes di talwit ay amusnaw !
Ali Ousliman.Bachouchi Yerra-t ar teqbayli
SM