Amawal-a n usisleg neɣ n ddublaj(doublage) s tmaziɣt, d yiwen n leqdic s wazal-is i yexdem mass Smail Abdenbi, i d-ssufɣent teẓrigin n Tfaska Taɣelnawt n Usaru Amaziɣ FCNAFA. Ameskar n umawal-a d yiwen n wudem i iqeddcen deg uḥric n tesliẓrant(audiovisuel) s tmaziɣt, netta daɣen d amyaru d amedyaz s tmaziɣt, ladɣa yetwassen aṭas s yimagraden-is i d-yeffɣen deg yiɣmisen d tesɣunin n tmaziɣt am : ABC Amazigh, Le Pays-Tamurt, Racines-Iẓuṛan,…Deg tezwert n udlis mass Smail Abdenbi, yura-d ɣef tixuṭṭert i yesɛa usisleg deg usnerni n yidles d tutlayt ; « Taẓuri n usisleg d tawwurt yeldin s idles n yiɣerfan n umaḍal. D taɣawsa izemren, seg tama ad tenjer abrid ara yesseddun tutlayt-nneɣ deg tmetti s useqdec n yisalalen n uḍebsi DVD, tiliẓri,..atg. Seg tama-nniḍen, ad teldi allen i uɣref-nneɣ, acku imesli akked tugna d aɣerbaz ideg ara tzemreḍ ad tlemdeḍ war leɛtab ». Mass Smail Abdenbi, akken ad isemmed amawal-a i d-yessufeɣ, inuda di akk imawalen n tmaziɣt yellan ama d wid i d-yettwaẓergen neɣ wid ur nessaweḍ ara ad d-ffɣen, am umawal n tusnakt i yemmugen deg yiseggasen n 80 deg tesdawit n Tizi Wezzu s ufus n yiwet n terbaɛt n yiselmaden yellan daɣen d imeɣnasen. Nnig n wawalen yellan deg yimawalen n tmaziɣt, ameskar, yeɛreḍ yessumer-d kra n wawalen imaynuten iss yezmer win iqeddcen deg unnar n usisleg s tmaziɣt ad yessenfali tignatin d tɣawsiwin icudden ɣer taɣult-a d teywalt s umata. Amahil yecban wa, iban ad d-yeglu s lmenfiɛa i wid iqeddcen deg uḥric n ssinima n tmaziɣt, imi ad afen deg-s akk awalen i uḥwaǧen, daɣen d asnerni i tnedlist tamaziɣt, i yuḥwaǧen ugar n yimawalen uzzigen n yal taɣult n tudert .
Mokrane Chikhi