Mazal ar tura deg umdun n Siwa, i yellan ddaw n tecḍaḍt n Maṣer, llan Yimaziγen i yettmeslayen tutlayt-agi n Siwa. Dγa s tmaziγt i d-yehder win yettmeslayen s yisem n ugraw i d-yusan γer tfaska n usaru amaziγ ass-nni mi tebda temlilit-nni iεeddan.
Nemlal yiwen deg Yimaziγen-agi n Siwa, newwi-d awal s tewzel yid-s.
Aγmis n Yimaziγen : amek i d-tewwḍem armi da ?
Omar Radjeh : nekk d imḍebber n yiwen udrum deg umdun n Siwa. Nettwanecced-d sγur Usqamu Unnig n Timmuzγa i wakken ad nttekki deg tfaska-agi tis 13 s yiwen usaru i yexdem yiwen Umaṣri i yellan d Aεrab. Afetraw-agi (documentaire), yemmal-d tudert d wansayen n yimezdaγ n Siwa. D nekni ihi i yellan s daxel-is.
Nusa-d, di&gamma,; i wakken ad nẓer atmaten nneγ Imaziγen n tmurt n Lezzayer. Nemlal akked Imẓabiyen, Itergiyen, Icawiyen…
Imaziγen n Lezzayer, am kunwi neγ mxalafen ?
Omar Radjeh : nettemcabi deg waṭas n tγawsiwin : deg wansayen, deg tutlayt, deg yidles s umata…mebla ma nettu deg yiwen wakal i nella…
Amek i ak-d-tban Tizi Uzzu : bγiγ lukan ruḥeγ γer tudrin n Leqbayel i wakken ad waliγ amek ttidiren. Bγiγ ad ten-waliγ deg tudert n yal ass. Xas ulamma lhan yimezdaγ n temdint n Tizi Uzzu, meεna temxalaf tudert nsent akked tin n tudrin…
I deg Siwa, amek tellam ?
Omar Radjeh : aql-aγ bxir. Siwa tettwaεzel, tebεed γef lwilaya i tt-iḥekkmen daymi i teqqim tmeslayt nneγ. Wa yettağğa-tt i wa. Ma d taεrabt, alamma nekcem s aγerbaz i tt-nettissin. At Siwa, ferḥen u ttzuxxun s yidles nsen, ṭṭfen deg-s akked leεwayed nsen…
Teslam s umennuγ n Yimaziγen n Lezzayer neγ ala ?
Omar Radjeh : zik, nγil nekni d Aεraben n Maṣer xas akken nettmeslay s tutlayt n Siwa. Armi d taggara n yiseggasen-nni n 1980 i aγ-d-yenna yiwen yimḍebber ameqqran n Lezzayer i d-yusan γur-neγ:’’ nekk d Amaziγ am kunwi. Llan watmaten nwen deg Lezzayer…’’ Nesla s umennuγ γef tmaziγt, afud igerrzen i yal yiwen.
Hocine. M