Ddren yigerdan n temdint n Tizi wezzu tasebḥit n wass n lǧemεa, ɣef teɣzi n yiwet n tsaεet akked yiwet n tceqquft n umezgun i d-yerra ɣer tmaziɣt Rida εemrani, iwumi yefka azwel « Dimna Amusnaw ».
Asentel n tceqquft-agi n umezgun , i d-uraren 7 wudmawen , gar-asen yella Yunes Ḥemmum, Karim Bubu , kahina Ḥeǧaǧ d wiyaḍ nniḍen , yewwi-d awal ɣef yiwen n uqcic i ixsen s waṭas tislatin n uqeccuḍ i d-xedmen imawlan-is iwakken ad uraren yis-sent ticeqqufin n umezgun, maca imawlan-is ttagin-as ad yurar yis-sent , iwakken ad d-yelhi d leqra-as.
Yiwen wass agrud-nni, yuker-d tasarut n texxamt n teslatin-nni n uqeccuḍ, ikcem ɣer daxel , anda d-yufa atas n isendyaq d waṭas n wunuɣen, daxel n yiwen gar yisendyaq-agi , yufa iselsa n ugellid, yelsa-ten ,imiren yesrafeg ɣer daxel n yiwen n umaḍal n usugen anda ttmeslayen yiɣersiwen , deg umaḍal-agi n yiɣersiwen yuɣal d agellid, maca yettu iman-is d wayen ilaqen ad t-ixdem i yineggura-agi, yeḍfer zzhu, wurar d wučči imi yessaweḍ wuccen ad as-ikellex s tḥila d wawal n diri armi yessebεed fell-as amusnaw n tgelda iwumi sawalen Dimna, seg wass-n yekcem ugrud-nni di yiwet n tɣerɣert n wuguren iwumi ur yezmir ara , maca di taggara yettwakkes ṭṭlam ɣef tidet i d-ibanen s tdukkli n yibekki d Kalila, tuɣal-d telwit d laman ɣer tgelda n yiɣersiwen yettmeslayen , agrud yuɣal s axxam-is issuter ssmaḥ di bab-as akked yemma-s, i as-yeǧǧan tasarut n texxamt n teslatin-nni n uqeccuḍ akken ad d- yili d netta ara yessetkelfen s useḥbiber fell-asent.
Malika Kebaili