Ilmend n umuli wis 56 γef zeḍmat id-yellan γef taddert n Maraγna taγiwant n yillulen umalu, yetabaεen Dayra n Wizgan, sγur amahras afransis, deg ass icuban ass n 03 maggu 1957, s usexedmen leslaḥ ẓẓayen d tesrafagin, anda i γlin 24 n yimeγrasen deg ugni n liser, ger-asen 17 d tilawin 07 d arac imecṭaḥ. Taddert n Maraγna smektan-d ass n 03 maggu i yellan d ass n umezruy lqayen i iresxen deg allaγen n yal tasuta ilebda. Dγa, tasebḥit n wass n 03 maggu, imezdaγ n taddert n Maraγna heggan-d yiwet n tejmilt meqqṛen i yellan d asmekti γef tedyanin n 03 maggu 1957, anda ildin s wudem unṣib yiwen n usebdad n 24 n yimarasen i yeγlin deg wegni n liser d asefel γef tmunent n tmurt n Lzzayer. Tajmilt-agi tella-d s leḥdur n yimezdaγ n taddert n maraγna d yimezdaγ n tudrin niḍen, imḍebren n tγiwant n Yillulen Umalu, tawacult n yigrewliwen d waṭas niḍen. Ahil n leqdic d amarkanti, anda llan temzikniyin γef umezruy n taddert n Maraγna, d umezruy n tegrewla n Lzzayer sumata. Iswi n tmesbanit-agi tamazrayt d asmekti umezruy lqayen tesεa tmurt n Lzzayer, d uressax n cfawat deg allaγen n yelmeẓyen akken ad t-id-affen-t tsutiwin id-iteddun.
Islam Bessaci