Ilmend n usmekti n wass aɣelnaw n unelmad, tidukla RAJ n tesdawit n Bgayet, tessudes-d Tiẓrigt tamezwarut n wussan iɣelnawen n umezgun asdawan n tlawin i d-yellan d tajmilt i tmeɣnast Nabila Djahnine. I teɣzi n xemsa n wussan, seg 15 ar 19 mayu, aṭas n leqdic i d-yellan deg tmezduɣin yemxalafen n tesdawit n Bgayet d uxxam n umezgun Malek Bouguermouh. Ladɣa yella-d uskan n tceqqufin n umezgun n trebbaɛ i d-yerzan seg waṭas n lwilayat n tmurt : Batna, Xennecla, jijel, Bumerdas, Sṭif, Galma d Tizi Wezzu ; am wakken daɣen i d-llant tufɣiwin ɣer yimukan n umezruy d yidles yellan di temnaḍt n Bgayet yecban taddart n Yifri (Awzellagen) anda i yemmug Ugraw n Ṣṣumam akked asalay (musée) n Ccix Aḥeddad yellan di Sedduq. Deg wahil daɣen yella-d umeslay ɣef tmeɣnast Nabila Djahnine d usekfel n umennuɣ-is ama di tesdawit neɣ deg umussu aduklan. Akken ad nesmekti, Nabila Djahnine d yiwet n tmeɣnast n tugdut d yizerfan n tmeṭṭut i nɣan yifassen n rrebrab ass n 15 fuṛar 1995. Nabila Djahnine, mi tella meẓẓiyet tebda yakan leqdic adelsan deg temdint n Bgayet ideg d-tekker. Deg useggas n 1987, yuɣ-itt lḥal d tanelmadt di tesdawit n Tizi Wezzu, din teslul-d Amazday (collectif) n tnelmadin ideg teqdec aṭas ama deg yidles d umennuɣ ɣef tugdut d yizerfan n umdan. Deg useggas n 1990, teslul-d tidukla « Tiɣri n tmeṭṭut » iɣef tella d taselwayt. Nnig n leqdic adelsan, Nabila Djahine, tennuɣ mgal meḥyaf d uṛkaḍ n yizerfan n tmeṭṭut di tmurt n Lezzayer, am akken daɣen i tennuɣ ilmend n tukksa n lqanun n twacult (code de la famille) i asent-yekksen izerfan i tlawin di tmurt n Lezzayer. D amennuɣ-a i as-d-yewwin taɛdawit n wat icumar i yebɣan izzayriyen ad idiren di ṭlam i lebda. Ɣedren-tt wwin tarwiḥt-is, am akken xedmen i Tahar Djaout, Boussebci, Kamal Amzal d wiyaḍ, ad ten-yeṛḥem Ṛebbi akken ma llan.
M.C