Tiddukla tadelsant Inagan n tɣiwant n Leqer tessuddes-d ussan n lǧemɛa d ssebt yezrin sin n wussan n unadi d usqerdec ɣef temsalt n yidles d tgemmi d useḥbiber fell-asen. Imi, d aggur n tgemmi, fursen yiɛeggalen n tiddukla iwakken ad ldin tibbura n uskasi d usejhed n yiɣallen iwakken ayen akka yellan d agerruj ur yettruḥu ara si gar yifassen. Ɣef waya, Inagan, i d-yellan s wudem unṣib deg waggur n meɣres yezrin bdan leqdic-nsen s kra n yisaragen i d-wwin yisdawiyen d kra n wudmawen yettwasnen deg unnar. Amenzu, d awal i d-yewwi Hamid Bilek, n Usqamu Unnig n Timmuzɣa ɣef wayen yerzan tigemmi d wamek ara iḥareb fell-as umdan. S yin, d Massa Chérifa Bilek i d-ileqmen awal ɣef tutlayt tayemmat d uselmed n tmaziɣt di Lezzayer. Akud, mačči d win i iqadden i waṭas n yiseqsiyen i d-wwin wid akk i iḥeḍren i temlilit. D tajmilt dɣa i terra Massa Bilek i yinelmaden d yimawlan-nsen i ifernen ad ɣren tamaziɣt, tin akken rran yimḍebren i win kan iwumi yehwa ad tt-iɣer. Tameddit n wass, d Idir Belheimeur, s timmad-is d aselmad di tesdawit n Tizi Ouzou i d-yewwin awal ɣef yiẓuran d yinumak n tefsut n 80. D asentel s wazal-is, imi deg-s i texleḍ tsertit d leqniɛa n yimdanen. Ahil i d-ihegga Sadi Kaci d yimeddukkal-is d amerkanti, imi xemmen i waṭas n yiḥricen anda rran tajmilt i wid yesselmaden tamaziɣt. Mebla ma ttun, gren tiɣri i yimedyazen n tɣiwant-nsen iwakken ad d-ssufɣen si tufra ayen i kesben d agerruj.
S. M