Ugar n ṭam (8) n yiseggasen netta d aεeggal n tidukkla tadelsant Adrar n Fad, akken kan iεfes amnaṛ-is yuma aqeddic-is s telqey, war aḥbas, acku ass mi d-yekcem ɣur-s almi ad tt-yebɣa seg ul. Seg tazwara n useggas-a deg nella tuɣal temɣuṛ tmasit-is acku iṣaḥ-as-d yiseɣ ad yili deg yixef n tidukkla d aselway. Mass Bacir Miri neɣ Lbacir n Ayt Mira s tezwawt yeqbel war aqlilet ad aɣ-d-yerr ɣef yisteqsiyen-nneɣ. Hatta tdiwennit sbennem-tt.
Mmeslayet-aɣ-d ɣef waddad n tidukkla ass-a deg ussan…
Tidukkla tadelsant Adrar n Fad d tin yettsemmiden deg ubrid tewwi acḥal d aseggas tura s yiwen n lebɣi d waṭas n yiswan am deg tazwara n umecwaṛ, aya yessegzay-d belli ass mi d-tlul tella tettecrurud, tura aql-itt tleḥḥu kra kra ɣer yimal yeğğuğgen d yisenfaṛen i d-yettnernin.
Ma nuɣal-d cwiṭ ɣer deffir, ɣer tfaska yezrin d acu d amaynut i d-yellan, neɣ tamuɣli swayes teffɣem ?
Tafeska n tmedyezt yezrin i d-yettilin yal tafsut d tajmilt i Dda Lmulud n Ayt Mεemmeṛ zemmreɣ ad d-iniɣ tefka-d ayen nessaram, ama seg tama n warmuden n tfaska deg kraḍ n wussan neɣ seg tama n umennuɣ adelsan. Nekkni s iεeggalen n tidukkla nwala dakken aqeddic i d-yellan deg meɣṛes 2013 d win yessecṛahen, yessefṛaḥen deg tuget-is, ɣa ma yella lexṣas yellan, d tuqin n wallallen ay nla ur aɣ-ğğin ad nefk ugar n wayen i d-nefka. Γas akken, agejdan yemmug. Am yal tikkelt tidukkla tettlaqa amaynut di yal taẓrigt. Dima ɣef tfaska yezrin anida nwala snat n tmaynutin ɣef tfaskiwin nniḍen : afran n 50 n yimedyazen ay ulin ɣer usayes i tmenna seg 130 ay tekkan, akked umsizwer uzzig i yerzan 15 n yimedyazen i d-yufraren deg mraw n teẓrigin iεeddan.
D acu d lexṣaṣ uɣef tettmeslayem ?
Lexṣaṣ i d-nettmaggar yerza tamsalt n wallalen s umata akken ad tawdeḍ taseddaṛt uheggi iweqmen, maca tella taluft n tnezduɣin n lembat n yinebgawen-nneɣ ay yettilin d aɣilif yesdebdiben yal tikkelt acku anezgum-nneɣ amezwar nebɣa ad ilin wid i d-yerzan i Wedrar n Fad deg ṛṛaḥa seg yal tama, dɣa ɣef tsebbiwt n waya ay d-nesnulfa deg internet tasutert neɣ ayen umu qqaṛen s tefṛansist (pétition) i wakken ad yerr udabu awellih-is ɣur-nneɣ, ad yesres daɣen ass n mraw (10) seg meɣṛes d ass aɣelnaw n tmedyezt tamaziɣt, annect-a yewwi-yi-d mačči alama neεya deg ustenyi akken ara aɣ-d-fken ayen nessutur maca win yebɣan ad yestenyi atan d afud ay d-yerna i yidles amaziɣ s umata, tansa n tsutert d ta : http://www.petitions24.net/httpwwwadrarnfadcom .
Yella-d kra n uqeddic ilmend n 20 yebrir ?
Ih am yal tamnaṭ n tmurt n Yizwawen, 20 yebrir ad yeqqim d ass n usmekti, n waktay iqeṛṛḥen, ur d-nga tmeɣṛa i ccḍeḥ, maca nesfuggel, neɣ ad d-iniɣ nesmekta-d azemz-a s kra n warmuden gar-asen : tifsarin ay yemmuggen deg uxxam n yilemẓiyen ɣef wayen yeḍran deg yebrir n useggas n 80, yiwet n temzizzelt ma zemmreɣ ad d-iniɣ gar sin n yiɣerbazen neɣ n tesmilin n tmaziɣt n Ayt Smaεel, taceqquft n umezgun n Muḥend Uyeḥya (Si leḥlu) ay d-turar terkeft tamaynut n tidukkla « tikli ɣer zda », akked cwiṭ n tuɣac izellzen sɣur terbaεt n ccna n tiddukla « anza n wedrar ».
D acu tettheggim sey-a i zdat ?
Ass-a deg ussan tettheggi iman-is tiddukla i sin n ttiεadat s wazal-nsen : asmekti n tmenɣiwt sɣur Ixabiten n unaẓur d ucennay agaεmir Lwennas n Ayt Lewnis ass n 25 yunyu, rnu-yas amsiẓwer n yiqennucen n taddart n Ayt Smaεel d tid i as-d-yezzin, ara yilin deg yulyu ma ira Yuc, war ma ttuɣ aheggi i teẓrigt tin mraw-sin n tmedyezt tamaziɣt i qabel.
D acu tessaramem s yisem-nwen d aselway n tidukkla tadelsant Adrar n Fad ?
Asirem-iw aleqqaq, bɣiɣ ad neqqim s tzemmar-ayi deg ul, daɣen nekk s yisem-iw ad izmireɣ ad wehhiɣ afus ugar i yidles-iw anaṣli akked tutlayt-iw tayemmat, am akken ssarameɣ tidukkla ad taweḍ taseddaṛt ara tt-yeğğen deg tqacuct. Ur zmireɣ ad seqqfeɣ awal-iw war ma ceyyεeɣ asnemmer wayeḍ i wid akk i d-iteddan i yidis n tidukkla, i yimdanen yettεawanen tidukkla s tɣara neɣ s tayeḍ akken ad igerrez umahil-is, ama seg uxxam n tɣiwant n Ayt Smaεel neɣ d imdukkal n tidukkla, akked iεeggalen n tesqamut n yinzurfa n tfaska, yal yiwen s yisem-is.
Yesteqsa-t Mhenni Xalifi