I lmend n wass agraγlan n warrac imecṭaḥ akked usellek n leqraya n yinelmaden imeẓẓyanen, ihegga-d uγerbaz amenzu Saliha Ouatiki n temdint n Tizi Uzzu yiwet n tmeγra ass-nni n letnayen iεeddan. Tameγra-agi, ḥeḍren-tt aṭas n yimḍebbren n uḥric-agi n ttrebga akked yimawlan n yinelmaden. Deg wahil n tmeγra, yella-d ccna, tamezgunt akked ccḍeḥ n warrac imecṭaḥ. uqbel ad tebdu tmeγra, nnan-d imaṣwaḍen yiwen wawal anda i d-beggnen azal yesεa leqdic am wagi. Ma d tanemhalt n uγerbaz-a, terra tajmilt i wid akk i d-iheggan tameγra-agi, ladγa, tiselmadin n yinelmaden i yekkan deg wahil-agi. Arrac, ass-nni, ussan-d s lferḥ s aγerbaz. Sεeddan tiswiεin igerrzen. Anwa yeẓran ? Ahat, yiwen wass, ad yissiweḍ uγerbaz azzayri ad t-ḥemmlen yinelmaden, ad d-ttasen γur-s s lferḥ !
Hocine.M