Imezdaγ n temnaḍin yemgaraden n lwilaya n Tizi-Wezzu bdan sewjaden imman-nsen di ddurt-agi tanegarut n remḍan useggas 2013, i tmeγra n lεid tamaẓyant ara d-yillin di tagara n ddurt-agi ideg nella. Ayagi ibban-d di twaculin d yemdanen i yetteqsaden s waṭas tiḥuna n lebsa yemgaraden; xarṣum tid yettewxeṣen i warrac imecṭaḥ, anda imdanen reglen i leγla n yisufar n wučči, tteqsaden tiḥuna d leswaq imeqranen n lebsa yemgaraden s leswam yemxalfen. Ddeqs n temdinin meqren, am Tizi-Wezzu, Iεeẓẓugen, Wizgan, At-Yiraten, Buγni d waṭas niḍen, uγallent deg ussan-agi ineggura n remḍan d leswaq yeldin azal iḍ, anda id-yella unḥarek meqren d tezizla ger yimestujar, id-yesenεaten selεa-nsen akken ad-jebden imectariyen. Di ddurt-agi taneggarut n remḍan, ibban-d akken lebsa n warrac imecṭaḥ d tin γlayen nezzah, tecεel tmes deg leswaq, imi asarwal n weqcic amecṭuḥ yeswa ger 1500 d 3000 idinaren, ma yella d irkasen neγ isebbaḍen yelhan ur d-γellin-ara s ddaw n 2500 idinaren. Dayen iwmi sḥasfen aṭas yemdanen, imi γef yiles-nsen nnan-d aεeggal n twacult yesεan ger 03 d 04 n darya, ur yezmir ara asen-d-yaγ lebsa, imi taksiwt n weqcic amecṭuḥ yesεan 06 n yiseggasen teswa ger 6000 d 8000 idinaren. Si tama niḍen wekkden kra imestujar i weγmis n Yimaziγen d akken leγla-agi, d selεa id-ikečmen si tmura n lbarani i yullin s waṭas di suma, ma yella d selεa i yettewxedmen di tmurt n Lzzayer tarreẓ-d kra d isuma, dγa yezmer ad-yerr kra n usirem i twaculin tizzayriyin yenxeṣen.
Islam Bessaci