Imezdaɣ n temnaḍt n “Ras Bouira” Ben Ɛabd llah , i d-yezgan seg 03ar 05 n yikilumitren ɣef ussamer n tɣiwant n tubiret, ttidiren deg tegnatin iwaɛren , imi rwan leɛtab n tikli ɣef uḍar iwazal n 05 ikilumitren gar-asen imuḍinen, imɣaren akked warrac imeẓyanen. Ugur-a yella-d deg wazal n 04 yiseggasen aya. D anect-a i aɣ-d-wekkden imezdaɣ -a, yerna nnan-d belli naɛtaben aṭas seg wasmi i ḥebsen ifurguyen i aten-issawaden zik , i iḥebsen ssebba n wid ara ixeddmen mbla lekwaɣeḍ n usiweḍ yerna tuget deg-sen teddun s yisebsiyen n lkif imi anect-a yeǧǧa imawlan ttagaden ɣef warraw-nsen d tlawin –nsen mi ara d-rekben yid-sen acku ala nutni ara yessawaḍen ladɣa deg wussan -a n yiṭij ireqqen, wekkden-aɣ-d diɣen dakken llant tikal ideg ttɣimin azal n tlata swayaɛ iwakken ad d-rekben tikwal teddun ɣef yiḍerren-nsen, ɣas akken cetkan acḥal n tikal ɣer srabes n usiweḍ i wakken ad asen-kksen lḥif-a i sɛeddan n lesnin acḥal d aseggas . Seg tama-nniḍen imsawaḍen iyellan xeddmen ɣer tama-ya wekkden ula d nutni anect-a dakken ssebba n uḥbas-nsen yella-d ssebba-nnsen imi walan dakken nutni ttxellisen tabzert maca wiyiḍ-nni ur ttxellisen ara nnan-d daɣen ɣas akken cetkan aṭas n tikal i unemhal n usiweḍ akked yiɣallen n laman iwakken ad kksen ugur –a maca nutni ur xdimen acemma i wakken ad ten-ḥebsen ɣef waya uɣalen zenzen akk ifurguyen-nsen uɣalen beddlen lxedma, ma seg tama n tnemhalt n usiweḍ tessefhem-d d akken nutni tt-ceyyiɛen-d wid ara imsawaḍen ara ixedmen ɣer tama-ya maca mi iruḥen ad xedmen ad ttgallan deg-sen dakken ad asen-rrẓen lkiran-nsen ɣef waya i gguman ad xedmen, ma d ayen yerzan widen ara ixeddmen mbla lekwaɣeḍ ma ad asen –fken lekwaɣeḍ neɣ ala imi ḍelben akken ad xedmen s lekwaɣeḍ anemhal iwekked-d dakken win yebɣan ad yexdem ilaq ad yesɛu afurgu neɣ lkar i yettawin nnig n 15 yimukan d anect-a ur sɛin ara wigi i ixeddmen mbla lekwaɣeḍ acku sɛan tifurguyin mmeẓẓiyit . Ma d ugur-a yenna-d yefru deg wussan-a i d-iteddun lameɛna s lemɛawna n yiɣallen n laman akked yimezdaɣ n tama-ya.
B.S