Adrar n ğarğar yecfa, γef ass mi i d-teḍra txazabit n tmenγiwt tamenzut n yimṭurfa ass n 2 unbir 1982 deg tesdawit n Ben-Ɛeknun di tmanaγt n Lezzayer. Kamal Amzal yemmut d ameγras γef tugdut, γef tmaziγt. Kamel amẓal ilul di tmunnent n tmurt n Lzzayer, deg useggas n 1962 di Tiferdud (At-Buyusef), d anelmad deg tesdawit n Ben-Ɛeknun, iruḥ d asfel amenzu s ufus n yimṭurfa i iqeddcen i lfayda n ukabar-nsen daxel n tesdawit.
Tasaεet tella d 8 tmeddit, Kamal Amzal iεelleq yiwen n wulγu di lḥiḍ. Ulγu-yagi yessawal i unejmuε n yinelmaden i usbeddi n tesqamut ara yessuddsen leqdic. Imcaḥen n yidammen ur t-zgilen ara, acku muḥal umnen s tidet, umnen s uγurru.
Di tjeğğigt n temẓi swezlen-as leεmer, anagar 20 yiseggasen i yesεa, nγan-t s ujenwi wid ur nettuggad Rebbi. Kamal Amzal muḥal yekna i yimesbaṭliyen-agi, yettḥarab γef tiktiwin-ines i icudden γer yedles amazi&gamma,; γer tlelli d tidet, γer tugdut akked yizerfan n umdan, dγa yemmut fell-asent. Iεdawen n tmurt mačči n wass-agi kan neγ n yiḍelli kan. Wid i isexnunsen Kamel Amzal iḍelli i ixenqen tamurt ass-a. Ggulen ur yuli yiṭij γef tmurt, ggulen akken ad gezmen yal axalaf, ggulen ad sexsin yal taftilt iceεlen.
Wid i d-iγeḍlen rrehba γef tmurt n Lezzayer εzizen sexdamen ddin n tneslemt akken ad samnen imdanen, ad ddun deg lğerra-nsen. Ssaγen ajeǧğiḍ-nsen i yal tamnaḍt n tmurt, dγa reṣṣan iman-nsen maca nutni ur tt-bnin ara γef tidet, yal taγawsa-nsen d akellex.Wid yeččuren d tayri n tmurt wwten s tezmert-nsen, begnen-d ayen yellan deg-sen akken ad bnun tamurt, ad teddu γer zdat.
Γas akken imdanen-agi imagdayen srewten i leḥfa i lfayda n tmurt, maca ur tufiḍ iγelten, srewten εebban wiyaḍ. Γas akken zzerεen ṣṣaba-nsen temγi maca meggren-tt wiyaḍ.
Di tmunent n tmurt n Lezzayer, iεdawen n tmurt ur γfilen ara ṭṭfen adabu s uγurru. Γas akken bγan ad ḥettmen i yimdanen ayen ur bγin, γas akken xelqen-d uguren i yimdanen imagdayen i ten-ixulfen, muḥal sfeclen-ten deg umennuγ-nsen, ur knin ara i lbaṭel.
Asmi iwala udabu akken imdanen-agi tezdeγ-iten tidet muḥal bran i tilla, qublen-ten s ulac, ruḥen slulen-d tudsiwin tinselmin, imḍebbren-nsent d imṭurfa ɣef tneslemt, sεan
ahil aserti. Akka yal amḍiq sɣamen-as-id, undin-tt-id iwakken ad rẓen tanekra n yimaziγen i yessuturen izerfan n umdan akked tugdut.
Deg tefsut n yimaziɣen deg useggas n 80, walan d akken lasel n tmurt yezga ireṣṣa. Γas zzik gezmen ljedra tura iẓuran fkan-d ixulaf. Di tnekra-yagi, imaziγen ssutren izerfan-nsen, maca adabu amcum qqerεen-ten-id deg umennu&gamma,; wa sexnunsen-t, wa εegben-t, wa… Ayagi d ayen i d-yeḍran deg tesdawit n Tizi-Wezzu. Taxazabit n tmenγiwt tamenzut n yimṭurfa teḍra-d ass n 2 unbir 1982 deg tesdawit n Ben-Ɛeknun di tmanaγt n Lezzayer. Kamal Amzal yemmut d ameγras ɣef tugdut, γef tmaziɣt,γef Lzzayer uzekka. Γas akken yemmut, isem-is yeggra-d i lebda, tiktiwin iγef yemmut mazal ttnaγen wiyiḍ am netta fell-asent.
Islam Bessaci