Imezdaɣ si lǧiha, imḍebṛen teɛna temsalt n usizdeg d uḥareb ɣef twennaṭ (la nature) si lǧiha nniḍen, cektayen ɣef telxex d-yebḍen ɣer tudrin n Leqbayel. Aɣbel ur yeffiɣ yiwen. Xas akken aṭas n leqdicat d wahilen i d-yellan i lmend n usizdeg, maca ur bbiḍen ara ad rren tilas i wid yeffeɣ wul, wid ur nettqadar ara udug d yemdanen ukkud ttidiren. Zzik, lɣaci ur ssinen ara ugur-agi n iḍumman. Ttwalin-ten kan mi ara adren ɣer temdint. Tineggura-agi dunni taɛjel, mi d d-eldiḍ tabburt n wexxam, ad twaliḍ icekkaṛen n waṛṣaḍ, ččuṛer ar almi zelgen , senden di yal tiɣemmaṛ n lḥaṛa. Limmer d ayagi kan ishel as-d-yaf bnadem tifrat. Ayen um’ur zmiren ara yemdanen d lekwaɣeḍ d tṣaciyin yettawi waḍu seg tezniqt ɣer tayeḍ. Tezdeg-nni nat zzik teǧǧa amkan-is i wafrasen, ayerna i lebda. Imi ula d ilmeẓyen d telmeẓyin d yekka-n deg iɣeṛbazen (les écoles) d tesdawiyin (les universities) ɛemden i wayagi yettaɣen tawennaṭ. Aṭas n tikwal d nutni s timmad-nsen i yettezwirin akken ad fken tiyita um’ur tezmir twennaṭ-nni sen-d-yettaken abeḥri-nni ttcummun. M’ara d-yegger wawal ɣef usentel-agi (ce sujet), imɣaṛen d temɣaṛin ttcekkiṛen-d tudert n zzik, xas akken ulac aṭas n ttawilat yessifsisen tudert, xas akken tudert-nsen yak d amɛent, acku tezdeg ur s-ezzin ara s waɛrur. Xas ur ɣṛin ara, acku ḥṣan d akken afrasen d wid d-yettawin leḍeṛṛa meqṛen i tezmert n wemdan, iɣerṣiwen lak d yemɣan sumata. Tura ula d lmal, ma yeswa-d aman deg yeɣzer ad ten-t-yaɣ di ṣeḥḥa-s. Iberdan nat zzik, izenqan d leḥwaṛi-nsen ur sɛin ula d axuc, tura “yebbeḍ-ed zhir ɣer tudrin”. Ula d iɣezṛan, tiɛwinin , anda llan ttessen yemdanen, ladɣa mi ara ten-yeṭṭef lḥal di lexla, di lawan n cetwa lak d tefsewt, uɣalen ur d-banen ara s icekkaren, tiqraɛtin yemxallafen. Tura akken ad d- ɛeddiḍ zdat n ymekwan-agi, ladɣa mi tzad lḥamu, ilaq bnadem ad isud anzaren-is, acku ma yesraḥ tariḥt-nni d-yettenɛiɛisen deg-sen yezmer ad d-yerr ula d iẓerman-is. Tidikliwini lak d imḍebṛen n tɣiwanin (les communes) yetteḥbibiren ɣef tezdeg n ugama (l’environnement), iban asen-t-id d akken leqdic-nsen-t am win ineqcen deg waman.
Zenia T.