Isyin Mas Fawzi At Ḥmed, yiwen ger iɛeggalen n Tiregwa, yemeslay-d ɣef leqdic n tsebeddit-a deg useggas yezrin 2012/2013. Yefka-d akk leḥsab n wayen i tṣeref deg isenfaren-is, isaragen-is akked tejmilin i tga i yimusnawen d inaẓuren-nneɣ, wid/tid i yellan d inebgawen ama n Tiregwa neɣ n tuddsiwin nniḍen di Canada I ten-id-iɛerḍen. Fawzi At Ḥmed yemeslay-d akk s teqbaylit, yernu s usexdem n wallallen imaynuten am “Projection/PowerPoint”. D tikkelt tamezwaru ad yeḍru wannect-a deg Canada.
Mas Racid At Ali Uqasi, aɛeggalen n Tiregwa nniḍen, yetbeɛ-d s weskan n tedyanin/ahilen id iteddun sɣur tuddsiwin nniḍen. Am tmeɣriwin akked Abranis, Berbanya, Brahim Tayeb, Mourad Guerbas, Rabah Asma id iteddun deg imalasen/ledwar d wayyuren id iteddun. Daɣen taceqquft umezzgun tamaynut ad theggi Tinifsan n Mas Hacemess ass n 22 Meɣres 2014. Taceqquft-a “I lukan ad tuɣal tefsut” ad tili deg tzeqqa Le GESU i yettwasnen deg Montreal, anda id urarent ugar n tceqqufin yettwasnen deg Quebec. Yella-d daɣen umeslay neɣ tiɣri id yefka Mas Ɛacur Ferḥat, aɛeggal n tiddukla INAS, ɣef uɣerbaz n Tmaziɣt deg Montreal.
Deg taggara Ǧamila Belgacem, yiwet ger tɛeggalin n Tarbaɣt Tilleli, id iqeddmen tameɣra-a, tbereḥ-d s nuba n Si Moh, i waken ad yekcem. Dayen yeǧǧan imferǧen ferḥen imi wallan anaẓur ikcem-d s teɣratin d uṣefeq. Dɣa Si Moh yecna-d 24 n tezlatin ger teqburin/tiqdimin akked timaynutin/tijdidin n uḍebsi-is Lexla id yefɣen melmi kan, ass n 14 Tuber 2013 deg Fransa sɣur IZALAN. Ḥemleɣ, Ur neslib ara, Bɣiɣ akem zreɣ lukan d saεa, Nezza lbaṭel, Amɣar azemni, Imeṭṭawen-ik, D Lweḥda neɣ d zzuǧ kif kif, … d tizlatin I yeǧǧan imferǧen s yiwet n tsusmi ruḥen ddan unaggen ɣer temzi-nsen akked ccfawat n ussan-nni asmi i yellan deg tesdawit neɣ deg tamurt s umata
Deg taggara, Si Moh yeffeɣ-d ɣer imferǧen i t-iḥemlen, i yellan ttraǧun-t s ccuq ilmend n tewlafin/lewṣayef yid-s. Ad nesmekti kan belli akken tuɣ tannumi Tasbeddit Tiregwa, tefka-as arraz n tejmilt i Si Moh i yuran s yisekkilen n ureɣ annect-a: “Tajmilt i Si Moh ilmend n 28 iseggasen n ccna ifazen. Montreal ass 09 Unbir 2013”. Dayen ad yeǧǧen Si Moh ur I tettu ara ass mi id yerza ɣer Canada i tikkelt tamezwarut.
R.A.B