Tazɣent n yimẓabiyen d waɛraben gar tumast d tsertit. Tettidir lwilaya n Ɣardaya deg wussan-a yezrin tidyanin umennuɣ gar yimẓabiyen i yeṭṭafaren askud (courant) n yibaḍiyen akked waɛraben n Ccaɛabna. Maca, tinegura-ya mačči d tid i d-ilulen ass-a acku llant-d yakkan uqbel, ladɣa seld timunent n Lezzayer am temsbaniyin n 1975 gar Bni yesgen akked Grara, ad naf daɣen tamnaḍt n Bareyyan i yettwassnen ula d nettat s ccwalat. Danwi i d ibaḍiyen? Ibaḍiyen d yiwet n terbaɛt i d-ilulen deg tasut tamezwarut n lhiǧri, maca tarbaɛt-a temgarad ɣef tiyaḍ deg waṭas n temsal acku ad naf sexdamen tugdut s telqayt ladɣa deg wayen yerzan afran n uselway akked limamat. Ihi amezwaru i d-yesbedden askud-a d Ɛabdellah Ibn Ibaḍ maca yennerna ɣef ufus n Ǧaber Ibn Zayd i d-yufraren deg tallit-nni. Ass-a ad naf kra n tmura yeṭṭafaren askud-a gar-asent Salṭanat Ɛuman, Ẓanzibar deg Ṭanẓaniya akked kra n temnaḍin n Tefriqt Ugafa ( Ɣardaya deg Lezzayer, idurar n Neffusa deg Libya akked tegzirt n Ǧerba deg Tunes), ma yella d win i d-yesbedden tagelda n Yibaḍiyen deg tmurt n Lezzayer d Ɛabderraḥman Bnu Rusṭum afarisi, aneggaru-ya d netta i d-yesbedden tamdint n tihert (tiaret) deg useggas ( 761 S.T.Ɛ) syin akin rewlen ɣer wunẓul anda i d-sbedden tamdint n Ɣardaya s lemɛawna n uɣref amẓabi. AnwI i d imẓabiyen? At Mẓab neɣ Bni Mẓab d yiwen uɣref amazigh zrruzɣen-d seg lɛarc ameqqran n Yizennatiyen, ttidiren deg temnaḍt n Ɣardaya, acu kan imezwura i izedɣen tamnaḍt-a d idewwasiyen (nomades) ma d ayen yerzan lebni ad naf sbedden tamdint n Lɛaṭṭef deg useggas n 1012 S.T.Ɛ akked Ɣardaya deg useggas n 1085, taneggarut-a isem-is n tidet Taɣerdayt. Ssebbat n umennuɣ-a ? Ɛlaḥsab imezdaɣ n Ccaɛabna, nnan-d dakken ttwaḥqren acku d ibaḍiyen i yesseddayen lumur n tsertit akked tmetti, maca seg tama n yibaḍiyen ttwalin akken-nniḍen, acku nnan-d dakken aẓar n ccwalat-a yella-d ssebba n umgired adelsan akked uskud n tesreṭ (ddin) ladɣa deg yiseggasen n 70 ideg ibaḍiyen ur sɛin ara azref iwakken ad tekkin deg ukabar awḥid (F.L.N) imi d aɛraben i yeṭṭfen akabar-a deg temnaḍt-a. Tiseggray n Ccwalat-a ɣef temnaḍt n Ɣardaya. Timesbaniyin-a glant-d s lexsara meqqren ɣef temnaḍt n Ɣardaya; imi azal n 90 yixxamen i yerɣan akked 60 tḥuna i yettwarẓan, rnu ɣer waya aṭas n yilmeẓyen i yettwajerḥen ma d wiyaḍ refden-ten yiɣalen n laman ɣer usekref (lḥebs), maca imḍebbren n tmurt ɣef uqerru-nsen aneɣlaf amezwaru yegred tiɣri i yimezdaɣ-a iwakken ad ḥebsen Ccwalat.
Ziar Ahcene