Xas akken taswiɛt ur teshil ara ɣef tiddukla “Relais et solidarité», maca ur tettu ara imuḍan. Am yiseggasen iɛaddan, i tikelt tis tlata iɛaggalen-is rzan ɣef wazal n 30 n warrac d teqcicin i yurrez waṭan deg sbitar. Ẓran-ten-id ass nni n 9 yennayer 2014, budden-ten s trezzaf, yerna ddan kra n yinazuren i yelsan i wakken ad seḍṣen imecṭaḥ nni, ad sen-ksen lxiq. Ger iɛeggalen n tiddukla, yerna yedda daɣen Uqerru n Tɣiwant i sen-yellan d tayett di leqdic-agi. Deg iseggasen yezrin deg taggara n useggas i xedmen tirza-agi. Aqerru n tiddukla-agi, Mass Mezzar Ḥamid, yenna-aɣ-d belli yessaram ad yefk afus n tallelt i wid meṛṛa yulwan. S tirza am tagi, ad ksen warrac agi lxiq, ma d imawlan nsen daɣen ad sen-yekkes lweḥc. Am akken qqaren: Afus deg ufus, taɛkemt ad tifsus!
Yamun Karima