Dima deg webrid n umennuɣ azedgan, n useḥbiber ɣef yidles d weḥraz n tutlayt, Tidukkla Tadelsant Adrar n Fad deg yixef-is aselway Qerrac Lɛid tger-d tiɣri i kra n wid d tid i yettcettkiwen i ukaɣeḍ, i d-iberrun i yiḥulfan-nsen, neɣ s yiwen n wawal i yimedyazen anda ma bɣun ilin, ma bɣan ad tekkin deg tfaska n tmedyezt tamaziɣt deg teẓrigt-is tis-mraw-sin ara d-yilin am yal aseggas ayyur n meɣres i d-yiteddun seg 27 ar 29 deg tɣiwant n Ayt Smaɛel.
Nesteqsa aselway n tidukkla Mass Qerrac Lɛid akken ad aɣ-d-yefk ugar n yisallen ɣef wumsiẓwer-a yenna-d:”deg wayen yerzan asaḍuf n uceyyaɛ i tikkin ulac amaynut ɣef yiseggasen yizrin, imedyazen yesɛan nnig n 18 iseggasen ilaq ad ceyyɛen 3 n yisefra s sin n yimedyaten i yiwen uran s tmaziɣt tamirant d wallal n uselkim, ad d-yeddu isem n yimekki, tansa d wuṭṭun-ines akked tukkist n wezmam n tlalit ɣer: Tidukkla Tadelsant Adrar n Fad
Tansa: Cedex N° 03, BP 105, Aït Smaïl, Bejaia (06044), ALGÉRIE.
Til./Fax : (+213) 034 38 33 12 | Amafus : (+213) 0559 93 41 21 , neɣ s ttawil n internet ɣer umayel: [email protected], aya uqbel 26 seg furar 2014. Ma d ayen yerzan amaynut deg temlilit s umata Mass Qerrac yenna-aɣ-d belli yella, ladɣa imi aseggas-a d amulli wis 20 segmi i d-tlul tidukkla s lebɣi n yilmeẓyen n taddart:”akken ad nesfuggel ɛecrinsna n tidukkla, daɣen akken ad as-nerr tajmilt i unaẓur-a amuqqran ara d-bedreɣ, s yiseɣ d agaɛmir i ara yili yid-neɣ Zeddek Mulud d anagi n tfaska-a, ad as-nini tanemmirt s tussda”. Taggara yessaram Mass Qerrac Lɛid, imedyazen merra ad qadren asaḍuf agensan n temlilit akken yiwen ur yettaf iman-is ur yettwaqbel. Ihi ay At wawal ur ttağğat lekwaɣeḍ-nwen ad ten-tuli takka neɣ ad qqimen ttwafren kan deg leqğer, ta d tagnit akken ad tesbeyynem leqdic-nwen ɣef tmaziɣt, talsa, d ddunit d wayen nniḍen.
A win yessexdamen awal
D acu tḍemɛeḍ di tsusmi
Akken yella yir awal
I tella yir tasusmi
Teẓriḍ i ixeddem wawal
Teẓriḍ i txeddem tsusmi
Ma yexḍa ṣṣwab i wawal
Ma ad yili ṣṣwab di tsusmi
Mhenni Xalifi