Yedder, yessefra, yecna. Slimane Azem, yiwen gar inaẓuṛen i ixedmen aṭas i tezlit (chanson) taqbaylit, ilul di 19 cutambeṛ 1918 deg Agni Geɣṛan di lwilaya n Tizi Wezzu. Sliman d-yekkren deg yiwet n twacult n yifellaḥen, ur yufi ara maḍi iman-is deg uɣerbaz (l’école) ɣer wanda tsekecmen imawlan-is akken ad yelmed am netta am tezyiwin-is. Ur iserked ara iman-is di lakul, ɣef 11 n yiseggasen yeffeɣ-it-id akken meqqaṛ ad d-iḥami cwiṭ imawlan-is. Seg yimir i yebda amɛebbaṛ d dunnit i d as-yeseṛwan lemḥani. Ɣef 19 n yiseggasen yewwi abrid n lɣeṛba, d tinna i t-ijemɛen asmi yedder d wasmi yemmut. Mi yebbeḍ ɣer Paris, deg useggas n 1937, Slimane ur nufi iman-is la dagi, la dihin, yessufeɣ-d tazlit-is tamezwarut umu isemma “ A Muḥ, a Muḥ”. Tizlit-a (yecna-tt ɣef yinig, teffeɣ-d di fṛansa, deg yiseggasen n ṛebɛin), d tin yelḥan aṭas ama dagi di tmurt, ama di lɣerba. Asentel (le sujet) n yinig d win iɣef yessefra s waṭas. Ad d-nebder : « D aɣṛib, d abeṛṛani », « Ay afṛux ifirelles », « A tamurt-iw ɛzizen ».
Tamedyazt n dda Slimane di tin yettemcabin aṭas ɣer tin n Si Muḥ U Mḥend, (yiwet gar tgejda n tmedyazt taqbaylit, i yeddren di lqern win XIX). Ayen ten-iceɣben d iɣeblan n dunnit, uguren d-ttmagaren di tmeti (la société). Ssefruyen akken ad d-neɣlen ayen yella-n daxel-nsen akken ad d-ifsusen. Sefruyen daɣen ɣef wayen ttwalin : idrimen, tagmatt, nnif d tirrugza, tufɣa n laɛqel, d wayen nniḍen. « Llah ɣaleb kulci yeqleb », « Zzman tura yexxerweḍ » akked « Terwi tebberwi » d kra ntuɣac, gar tiyaḍ, n tezlatin yecna ɣef wayen iwala d wayen yedder di tmetti.
Slimane Azem yemmut di lɣerba, ass n 28 yennayer 1983, di Moissac (Fransa). Yeǧǧa-d deffir-es yiwen ugerruj s wazal-is, zyada ɣef n 170 d tazlitt.
Zenia T.