Lemmer d lecɣal n ṛṛay d ttedbir i yettarran bunadem d argaz, tili amur ameqqran deg Leqbayel yessefk d nutni ara yelsen icwawen, ad ǧǧen iberniyas i tlawin-nsen Aṭas n wid iheddren, inesxen lektub ɣef tmeṭṭut d lḥala n Leqbayel, nutni ur ssinen acu ɣef llan, wala fehmen ṭṭbiεa n lejdud-nsen, yettwassnen seg wasmi d-texleq yemma-s n ddunit. Гret, steqsit, sani terram, anda tewḍem ad tafem awal yiwen : d ayen yenna umezwaru i yenna uneggaru. Гef wawal-nsen, ɣef wakken i yasen-tefka tmussni-nsen «tameṭṭut ɣer Leqbayel ur teswi, ur terri ; argaz yeḥseb-itt am nettat am zzayla, ur aken-εniɣ ; ad tt-yaɣ, ad tt-yezzenz am wakken ara yaɣ, yezzenz taɣaṭ neɣ tafunast deg ssuq. Deg uxxam ur tesεi ṛṛay ula deg ucemma ; kra ara yili mazal-itt meẓẓiyet, deg-s cwiṭ n lmenfiεa, atan iban; asmi meqret, tekcem-itt tewser, ad tt-εezlen ɣer rrif, ad tt-ḍeqren am nettat, am uqecwal iqersen». Aya yakk d lekteb. Nekni yessnen akken tella lḥala n Leqbayel, ifehmen, yeẓran acu yellan deg wul n Uzwaw, nezmer ad neggal ur nḥennet belli ulac i yeεzizen ɣer Uqbayli am tmeṭṭut-is, εlaxaṭer yeẓra mebla nettat ddunit-is tefreɣ, axxam din ur yelli. Kra n lbaḍna d ṛṛay yellan, teεlem yes-s tmeṭṭut. Yak d Igawawen i yas-yeqqaren : «Ulac i yuεṛen, i nettagad am lehḍur n tsumta». Meẓẓi meqqer, ɣur-sen, yiwen ur yettewqam lḥaǧa mebla ccweṛ n uxxam-is. Lemmer d lecɣal n ṛṛay d tteḍbiṛ i yettarran bunadem d argaz, tili amur ameqqran deg Leqbayel yessefk d nutni ara yelsen icwawen, ad ǧǧen iberniyas i tlawin-nsen εlaxater, ɣef wakken nessen neẓra teddun lecɣal, d ṛṛay-nsent i ixeddmen. Kullec ɣef ufus-nsent, ula ma ur heddṛent ara deg tejmuyaε akked leswaq, d lehḍur-nsent i iḍerrun, d ṛṛay-nsent i ixeddmen s ddaw ufus ; aqeṛṛu n uxxam d tameṭṭut, am wakken i yas-qqaren : «Axxam mebla tameṭṭut am lebḥer mebla lḥut». Meḥsub d lḥaǧa ur nekmil ara.
Said Boulifa (1865 – 1931)