Lɣeṛba ur s ḥulfan ara kan wid yedren deg yinig. Ula d wid yellan dagi, ladɣa tilawin, ɛacent-ett. Asentel-agi yegla-d, deg tmedyazt, neɣ di cna, s iḥulfan n ṣbeṛ d lxiq. Tameṭṭut taqbaylit, yecnan ɣef lɣeṛba, di kra n tikwal ad tt-tafeḍ, tessefruy ɣef wayen tettidir, di kra n tikwal nniḍen, tessefruy ɣef wayen ttidiren-t tiyyaḍ. “Cna n teṭṭut taqbaylit udrig d win d-yettasen kan akka i yqublen lexṣaṣ n tdamsa di twacult, maca d win ara d-yesnulfun tanfaliyin-nniḍen», id d-yenna rachid Mokhtari, aneɣmas de wemyaru n waṭas n wungalen, ɣef usentel-agi.
Ger tlawin i yecnan ɣef yinig ad d-naf Crifa yebbḍen laɛfu n Ṛebbi di 13 meɣṛes yezrin.
“Ay aẓerẓuṛ
Tbeɛ-it ɣer lbabuṛ
In-as i wacu iyi-iɣuṛṛ
Ak yexdeɛ Ṛebbi a ṛṛay-iw
Mliɣ-as ul-iw
Yenna-d lxiṛ ɣer zdat”
Dagi, Crifa tceyyeɛ aẓerẓuṛ akken ad s-d-yawi lexbaṛ n win tḥemmel. Deg usefru wis sin lak d wis krad, tceyyeɛ tiɣṛi i wergaz-is yettun iman-is deg yinig. Tudert-is tesɛedda-tt weḥdes, tessaram ad d-yuɣal ɣer yidis-is uqbel ad ifat lawan.
“Ay aɣṛib sɛu laɛqel
Nesla ijaḥ ṛṛay-ik
Lɣerba ur tettdummu ara
Asmi ara ɣlin wuglan-ik
yeǧa-iyi netta iṛuḥ ɣer l’Paris
Ma d nek ṛwiɣ lemḥani »
« Di lɣeṛba yeɛṛeq yisem-is
Ur neẓṛi d acu it-ifnan
Yettu tamurt n lejdud d lwaldin id t-id iṛebban
Teyyar id d-yusa deg yiḍ
Awi-iyi ɣer wusbiɣ n tiṭ
Ma d keč a xuya tṛuḥeḍ
I nek ɣer menhu iyi-d-eǧǧiḍ »
Hnifa, ula d nettat, tesqerdec asental-agi n yinig ɣer ayeg id d-enna:
« Lamer ḥṣiɣ ayi tettuḍ
Vu wallen tizerqaqin
Fell-ak i tɣeṛbeɣ
Kecmeɣ timdinin”
“Yessetma xaqeɣ
Ul-iw d amuḍin
Win aɛzizen ctaqeɣ
Bbin-ett tṛumyin »
Hnifa dg tmedyazt-is theder-ed ladɣa ɣef yergazen yettbeddil yinig. Akken kan ara sersen iḍaṛṛen-nsen dinna, ad ttun ayen ǧan deffir-nsen: imawlan, tilawin d tarwa-nsen. Tilawin-nni ineqcen iqwiṛen, ileqḍen azemmur, yettṛebbin lmal ttwabedlen-t s tṛumyin. Deg usefru-agi, Hnifa tceyyeɛ tiɣṛi i tmeṭṭut umi yezzi wergaz-is aɛrur mi yebbeḍ ɣer Lparis.
« Ma tebɣiḍ ad am neggal
Aḥeq Sidi Hlal
Argaz-im deg Lpari
Ileḥḥu d mu userwal
Taqbaylit acḥal teṣbeṛ
Yerra-tt i lmal
Debbeṛ tura”
Zenia. T