Tafidiralit Tazzayrit n waddal n tegnawt s lemεawna n tdukkla n waddal n tegnawt akked idurar n temnaḍt n Wizgan, sudsen-d ddurt-agi yezrin yiwet n tannant taγelnawt i usuffeγ iselmaden n ṣenf n waddal-agi « affug di tegnawt », id-yellan ass n 18 almi d 24 maggu yezrin γef teγzi n 07 n wussan. Deqs n yinaddalen n ṣenf n waddal-agi id-yussan di lwilayat yemgaraden n tmurt n Lzzayer ukkan deg tannant-agi, amedya, Blida, Skikda, Bgayet, Tubiret, Taγardayt, Bumerdes, Lzzayer tamanaγt d Tizi-Wezzu. Amḍiq n waffug, yella-d deg uswel, id-yezgan deg idurrar εlayen n temnaḍt At-Zikki γef laεli n 1430 n lmitrat, almi d annar n turart n taddert n Saḥel i yellan d amḍiq i ittewxeṣen i trussi. Inaddalen-agi ttεellin di tegnawt azal n 1000 lmitrat, dayen id-yernan cbaḥa i temnaḍt n Wizgan. Imḍebren yellan γef lmendad n tannant-agi d mass Boudraa Ahcen, yiwen n umusnaw agraγlan n tmurt n Fransa meqren deg aḥric n waddal-agi affug di tegnawt, akken iyella nayeb uselway n tfiddiralit Tazzayrit n waffug n tegnawt mass Boukeffa Mourad, akked yemḍebren n tdukkla n waddal n tegnawt akked idurar n temnaḍt n Wizgan. Iswi n tmesbanit-agi n waddal, d asebγes n ṣenf n waddal « Affug di tegnawt » di tmurt n Lzzayer, anda leqdic iεedda di tegnatin yelhan aṭas, imi ttawilat iwulmen llan deg wemḍiq.
Islam Bessaci