Zik, mi ara tɛeṭṭel tissit n iweǧǧiben, ttheggin-d yemdanen ayen umu neqqaṛ anẓaṛ. Aheggi n tmeɣra-agi, ma nezmzr ad s-nsemmi akka, yettili-d ɣef snat n tikkal. Tikkelt tamezwarut, ad ṭfen-t tlawin aɣenja, ad s-jebḥen-t am teslit. Ad s-selsen-t taqenduṛt, lfuḍa, ad s agsen-t asaru, w’ad d-sersen-t i wqeṛṛuy-is amendil. Xas akken iswi d yiwen, maca acebbeḥ-agi yettemxalaf deg temnaṭ ɣer tayeḍ. Mi yekfa ucebbeḥ n uɣenja ad tefken-t i yiwet ger tullas ara tyawin. Mači weḥdes, taqcict ara yawin aɣenja, ad tḍefṛen-t tullas d tlawin deffir-es. Ad tteddun-t ad ttɣennin-t : « Anẓaṛ, anẓaṛ, a Ṛebbi ssew-itt ar aẓaṛ », « Aɣenja yettebliliḥ, nnig uxxam uqiliḥ, a Ṛebbi ssew-itt mliḥ »,…Deg webrid-nsen-t, tilawin, tullas tteḥbasen-t ɣer yexxamen akken ad sutren-t ad s-ent-id-fken ama d asqi aquṛan ama d ayen nniḍen s wayes ara ggen-t lweɛda. Mi d- ɛeddan-t yak ɣef yexxamen n taddart, tilawin-nni ad d-awin-t ayen yak d-ebbin-t ɣer walbɛaḍ n yexxamen. Azekkawen-nni ad d-ekren-t kra n tlawin n taddart akken ad –d heggin-t imensi s wayen id d-yettwajemɛen. Mi yewjed, ad d-asen-t yak tlawin, igerdan, tilmeẓyin ad ččen. ɣef ayen d-eqqaṛen at zzik, mazal imdanen setten m’ara d-yebru sidi i lxiṛ-is. Yal mi ara yili uɣuṛaṛ ɣef teɣzi n iweǧǧiben, imdanen ttheggin-d anẓaṛ akken ad ṛẓen aɣamac. Aseggas-agi, cetwa d tin ur neqbiḥ ara maḍi. Aṭas n wussan ɛeddan am wid n tefsewt…mebla ijeǧǧigen. Zzik nennum mi tekfa cetwa, iṛeqyab, iran n iberdan ad ten-tafeḍ ttezririgen-d deg-sen waman n leɛwanṣeṛ. Ijeǧǧigen fetḥen. Dunnit yak d tazeyzawt. Isekla, yeṛẓa wegris ɣef teɣzi n cetwa, ad bdun ad d-sufuɣen iferrawen mi ḥulfan i lḥamu n tefsewt. Iɣezṛan, tiregwa mbaɛid ara tesleḍ i waman yettazalen akken ad leḥqen ɣer wasif. Lebyur, tiɛwinin čuṛen ar almi d taqemmuct, ttenfalen. Cbaḥa n ugama, ttkmmilen-as yefṛax ara yettafgen ɣef isekla d itercucen. Tura teḥced dunnit. Imdanen uɣalen suturen tiqit n waman deg tefsewt. Iṛeqyab akken kan id d-efkan cwiṭ n leḥcic, winna iḥebsen anerni akken kan d-yeffeɣ deg wakal. Laɛwanseṛ ur d-ṭreḍqen ara. Ifṛax bedlen tamurt. Isekla ṭeggiren-d iferrawen-nsen s tugdi. Tiɛwinin quṛen-t. Imdanen aṭas aya mi bdan ttesmirin aman n lɛin ɣer lebyur-nsen akken ur ttectiqin ara tiqit n waman deg iɣamacen n unebdu,…
T.Z