Inelmaden n tesnawit Maɛuc Idris deg Lberj n Mira, i yesɛeddan ddurt yezrin akayad n BAC llan ur ttwarzan ara s tanga n tmaziɣt, acku ur tt-ɣran ara! Dɣa mi d-nebder taluft-a, nuɣal nettmesteqsiw ɣef wacimi: d inelmaden neɣ d ibabaten i tt-yugin? D aɣerbaz ur d-iga ttawil iwulmen? Neɣ tella tmentilt tayeḍnin?. Anemhal n tesnawit, ur aɣ-tettunefk tegnit ulama s tilifun akken xersum ad as-nessuter kra n yisegziyen ɣef waya. Maca kra n yinelmaden ed yiselmaden gan-d tafat i taluft almi i d-banen iẓuran n tagut. Rray amatu n yinelmaden isenned ɣef uɣilif n tulacit n yiselmaden, meḥsub aɣerbaz ur asen-d-iḥebber ara iselmaden ula i wid iḍefren tasekla wamma afurek n tussna fiḥel ameslay. Nnan-aɣ-d dakken seg tama-a ur d-tekka ara sɣur-sen imi werǧin gan tagant ɣef tanga-a ed tutlayt-a tayemmat. Aselmad n useggas amenzu deg tesnawit Maɛuc Idris Mass Nabil Xaldi, s tumert i iqal ad d-yerr i tuttriwin-nneɣ, maca daɣen ad iger nnehda, imi ula d netta yettawi taluft-a d adekkir. “Aɣilif yellan, ulac iselmaden. Wid yesɛeddan akayad n BAC ilindi d tasuta i d-sekreɣ deg teɣzi n kraḍ n yiseggasen. Ihi mi d-uɣaleɣ daɣen ɣer tressa ggran-d yiswiren wis-sin ed wis-kraḍ war aselmad acku nekk ur zmireɣ ad ṭṭfeɣ kraḍ n yisiwiren”. Negza win i aɣ-d-yettmeslayen s telqey, iban dakken ulac array n uwellih, tuddsa ed lebɣi n tmaziɣt sɣur tenmehla n uɣerbaz, acku ma ulac tadukkli acemma ur yettili. “ Yerna inelmaden mačči d wid ur nebɣa tamaziɣt neɣ ur d-newwi iman-nsen deg-s, acku ilaq ad teẓrem dakken seg wid i tt-yesɛeddan ilindi deg BAC, aneggaru yesɛa-d tazmilt n 11 ed kra, ma d amezwaru tewweḍ i 19”. I aɣ-d-yerna daɣen Nabil Xaldi s usḥissef ɣef uɣilif n wass. Ihi tuttra tagaɛmirt i d-iḥettmen iman-is, iwacu zun annim-a? Iwacu i d-yekka uktar seg nnig n ukanun?. Acku mi nerna nnuda iban-d dakken deg temkarḍit n tesnawit-a ɣef nettmeslay ula d adlis n tmaziɣt ur inuḥ deg-s, mačči d agejdur ugar n tsuham? Acimi nrennu tiyitiwin i yiman-nneɣ nnig tid i yettrasen fell-aɣ yakan? Ula deg Uqbu daɣen, wwḍen-aɣ-d yisallen dakken yiwen n unemhal, s timmad-is i yekkes tamaziɣt seg wahil, am win yekksen taceɣɣabt, tasusamt i uṭufan. S yisalli-a ur nessecrah, ahat ad yili dayen useggem i useggas i d-iteddun? Ladɣa ma beggnen-d yibabaten ed yinelmaden urrif-nsen d abrid, acku akken qqaren yimezwura-nneɣ: waha mačči d rray.
Mhenni Xalifi