Belɛid Izarar, yettwasnen s yisem n Belɛid At Ali, d netta i yerẓan asalu i yemyura n teqbaylit. Yekker-ed deg lmizireyya, tinna t-iḍefṛen am tili-s ar almi s medlen-t wallen. Yennemḍaṛ ar almi ḥfan iḍaṛṛen-is. D mmi-s n tselmadt, Belɛid yelmed tutlayt n tṛumit akken kan d-yeffeɣ di dduḥ. Ayagi, mi ara tmuqleḍ, d ayen ara s isishlen tudert-is, maca, abrid d-yebbi, yettemcabin aṭas ɣer win n si Muḥend U M’ḥend, yeččuṛ d iɛekkiṛen. Ceɣlis ala anemḍeṛ. Adeg yettak-it i wayeḍ. Ur yetterkad ara deg yiwen n wemkan. Tissit tefka-yas axeṣṣaṛ, d nettat i yellan deffir yak iɣelliyen-is, yir tamɛict d waṭṭanen t-yeṭfen. Ula d tamettant-is tella-d sebba n waṭṭan n turin-is lak d wawi yerr i s yeskawen ifadden-is. Belɛid Izarar ilul deg useggan n 1909 deg Weẓṛu Uqellal, llan wid nniḍen d-yeqqaṛen d akken ilul deg Tugirett anda tella yemma-s tesselmad. Belɛid d agrud wis setta deg yiwet n twacult yesɛan xemsa n tullas d tlata n warrac. Deg 1915, yella yesɛa setta n iseggasen. Yemm-as teǧǧa aselmed, tebbi-d tawacult-is ar Weẓṛu Uqellal, di tama n Aïn El Hammam. Aseggas-nni kan yekcem ɣer uɣerbaz n taddart anda d-yufrar ger tezyiwin-is, acku netta yella yessen tutlayt n tṛumit d waṭas n wayen nniḍen s tselmed yemma-s. Di tazwaran umecwaṛ-is n tira, yedha-d kan s tira n tmucuha s tutlayt n teqbaylit. Ger tid ijerred, ad d-nebder izwal-agi : Tamacahutt uwaɣzniw, tamacahutt uɛeqqa yessawalen, tamacahutt n Bu-Yedmim, tamacahut inisi d wuccen, tafunast ibujilen, lwali n wedrar, aẓidan d umerẓagu,…Deg imir tuɣal tezzi lwelha-s ɣer tira n wungalen. D netta i yxedmen aquddim warǧin xedmen, ula d wid d-yekren deffir-es, Ben Sedira lak d Boulifa, yellan sbuḥuten-d, ula d nutni, inzan, isefra, d tmucuha yettawin ttarran ger umeẓẓuɣ d yimi. Belɛid At Ali d netta i d amyaru amenzu i yebdan tira n wungalen s tutlayt n teqbaylit. D netta i ysersen imɣan imezwura deg wennar n tsekla yella-n d asuki. Deg useggas n 1950, Belɛid At Ali yebbeḍ laɛfu n Ṛebbi.
T.Z.